- మహిళా సంఘాలకు మరో 40 పెట్రోల్ బంకులు
- జూన్ 2న నాటికి 20 బంకులను ప్రారంభించేలా చర్యలు
తెలంగాణ ప్రభుత్వం తీసుకున్న తాజా నిర్ణయం..మహిళా సంఘాలకు మరో 40 పెట్రోల్ బంకుల కేటాయింపు,సాధారణ సంక్షేమ చర్య కాదని స్పష్టంగా చెప్పాలి. ఇది మహిళలను లబ్ధిదారుల స్థాయి నుంచి వ్యాపార యజమానులుగా తీర్చిదిద్దే వ్యూహాత్మక అడుగు. రేవంత్ రెడ్డి నేతృత్వంలోని ప్రభుత్వం ప్రకటించిన ఈ కార్యక్రమం, మహిళా సాధికారతను నినాదాల నుంచి ఆచరణలోకి తీసుకువచ్చే ప్రయత్నంగా కనిపిస్తోంది.
రాష్ట్రంలో కోటి మంది మహిళలను ఆర్థికంగా బలోపేతం చేయాలనే లక్ష్యంతో ప్రభుత్వం ముందుకు సాగుతోంది. స్వయం ఉపాధి, ఉద్యోగ అవకాశాల కల్పనలో భాగంగా తీసుకున్న ఈ నిర్ణయం, మహిళలకు స్థిరమైన ఆదాయం మాత్రమే కాదు..నిర్ణయాధికారాన్ని కూడా అందించడంలో కీలక పాత్ర పోషించనుంది.ఇందిరా మహిళా శక్తి స్కీం కింద అమలు చేస్తున్న ఈ పథకం ద్వారా మహిళలకు నిర్వహణ బాధ్యతలు అప్పగించడం విశేషం.
ఇప్పటికే సంగారెడ్డి, నారాయణపేట జిల్లాల్లో మహిళలు నిర్వహిస్తున్న పెట్రోల్ బంకులు విజయవంతంగా కొనసాగుతుండటం, ఈ మోడల్కు బలమైన నిదర్శనం. అయితే, ప్రకటనలకే పరిమితం కాకుండా అమలులోనే అసలు సవాళ్లు ఎదురవుతాయి. భూముల కేటాయింపు, బ్యాంకు రుణాలు, సరఫరా ఒప్పందాలు..ఈ మూడు అంశాల్లో పారదర్శకత, వేగం అత్యంత కీలకం.
ఇండియన్ ఆయిల్ కార్పొరేషన్, భారత్ పెట్రోలియం, హిందూస్తాన్ పెట్రోలియం వంటి సంస్థలతో ఒప్పందాలు కుదుర్చుకోవడం సానుకూల సంకేతం. కానీ ఇక్కడే ఆగిపోకుండా, మహిళా సంఘాలకు తగిన శిక్షణ, నిర్వహణ నైపుణ్యాలు, ఆర్థిక అవగాహన కల్పించడం కూడా సమానంగా అవసరం.జూన్ 2 నాటికి 20 బంకులను ప్రారంభించాలని ప్రభుత్వం లక్ష్యంగా పెట్టుకోవడం ఆత్మవిశ్వాసానికి సూచిక. అయితే గడువుల ఒత్తిడిలో నాణ్యత దెబ్బతినకూడదు. వేగం ఎంత ముఖ్యమో, స్థిరత్వం అంతకంటే ముఖ్యం.
దీర్ఘకాలికంగా లాభదాయకంగా ఉండే విధంగా ప్రాజెక్టులను రూపకల్పన చేయడం అవసరం.మొత్తంగా చూస్తే, మహిళా సంఘాలకు పెట్రోల్ బంకుల కేటాయింపు ఒక ఆర్థిక నిర్ణయం మాత్రమే కాదు..సామాజిక మార్పుకు దారి తీసే దిశానిర్దేశక చర్య. ఇది సక్రమంగా అమలైతే గ్రామీణ మహిళల జీవితాల్లో గణనీయమైన మార్పు తీసుకురాగలదు. కానీ ఆ మార్పు నిలకడగా ఉండాలంటే, ప్రభుత్వం సంకల్పంతో పాటు బలమైన అమలు, పర్యవేక్షణ, మద్దతు వ్యవస్థలను కూడా సమర్థంగా నిర్మించాల్సిందే.