మనిషెంత మతలబోడో తెలుసా..
నువ్వు జంతువు అంటే గుర్రుగా చూస్తాడు
సింహం నువ్వంటే కాలరెగిరేస్తాడు !
కొన్ని బాధకు కన్నీళ్లు రావు..
మది మదిలోనే గాయాల్ని చేస్తాయి
క్షణ క్షణం మనల్ని వేటాడుతుంటాయి !
నా మీద నాకే కోపంగా ఉంది..
విష సర్ప నరుల్ని నమ్మినందుకు..
మానసిక ప్రశాంతతను కోల్పోయినందుకు !
నేను ఎవరి కంటే ఎక్కువ కాదు..
నా కంటే ఎవరు తక్కువా కాదు..
లక్ష్య సాధనలో నాకు నేనే సాటి !
అపార శక్తి మన మాటల్లో లేదు..
మన సదాలోచనల్లో దాగి ఉంది
పంట వానతో వస్తుంది, తుఫానుతో కాదు !
మన కాళ్లు గుడి వరకు తీసుకెళ్తాయి..
నిర్మల మనస్సే దేవుడి వరకు చేర్చుతుంది
గుడిలోని విగ్రహాన్ని మది గదిలో నింపుకో !
జీవితమో రైలు ప్రయాణం..
జనాలు వస్తుంటారు, పోతుంటారు..
ఆఖరి స్టేషన్లో మనల్ని ఒంటరి చేస్తారు !
వర్షానికి పక్షులు గూట్లో దాక్కుంటాయి..
మేఘాల పైకి చేరి తప్పించుకుంటుంది డేగ..
ప్రమాదాల్ని తెలివిగా దాటుతూ కదం తొక్కు !