ముదిరాజ్‌లకు ప్రత్యేక కార్పొరేషన్ ఏర్పాటు చేయాలి..

• సామాజిక న్యాయం కోసం పెరుగుతున్న డిమాండ్

ఆంధ్రప్రదేశ్ రాష్ట్రంలో వెనుకబడిన వర్గాల సంక్షేమం, ఆర్థిక సాధికారత కోసం ప్రభుత్వాలు అనేక పథకాలు అమలు చేస్తున్నప్పటికీ, కొన్ని సామాజిక వర్గాలు ఇప్పటికీ ప్రత్యేక గుర్తింపు, లక్ష్యబద్ధమైన అభివృద్ధి కోసం ఎదురుచూస్తున్నాయి. అలాంటి వర్గాల్లో ముదిరాజ్ (ముత్రాసి, తెనుగోలు) సమాజం ఒకటి. రాష్ట్ర అభివృద్ధిలో కీలక పాత్ర పోషిస్తూ మత్స్యకార వృత్తి, వ్యవసాయం, చిన్న వ్యాపారాలు, సంప్రదాయ వృత్తుల ద్వారా జీవనోపాధి పొందుతున్న ముదిరాజ్‌లకు ప్రత్యేక కార్పొరేషన్ ఏర్పాటు చేయాలనే డిమాండ్ మరోసారి బలంగా వినిపిస్తోంది.

ఈ డిమాండ్‌ను జనసేన నాయకులు, ఆంధ్ర ప్రదేశ్ ముదిరాజ్ మహాసభ రాష్ట్ర యూత్ వైస్ ప్రెసిడెంట్ పట్టుకోట్ట చెంచు శ్రీనివాసులు ముదిరాజ్ బలంగా ముందుకు తీసుకొస్తున్నారు. ముదిరాజ్‌లకు ప్రత్యేక కార్పొరేషన్ ఏర్పాటు చేసి, వారి సామాజిక, ఆర్థిక, విద్యా అభివృద్ధికి ప్రత్యేక కార్యాచరణ రూపొందించాలని ఆయన ప్రభుత్వాన్ని కోరుతున్నారు. ఈ అంశాన్ని రాజకీయ కోణంలో కాకుండా సామాజిక న్యాయం, ఆర్థిక సాధికారత, విద్యా పురోగతి దృక్పథంతో పరిశీలించాలని ప్రభుత్వాన్ని, జనసేన అధినేత పవన్ కళ్యాణ్ ను కోరుతున్నారు..

ముదిరాజ్‌లు ఇంకా వెనుకబడే ఉన్నారు :

రాష్ట్ర జనాభాలో గణనీయమైన శాతం కలిగి ఉన్నప్పటికీ, ముదిరాజ్ సమాజానికి ప్రత్యేక సంక్షేమ కార్యక్రమాలు, స్వయం ఉపాధి రుణాలు, ఉపాధి అవకాశాలు, విద్యా ప్రోత్సాహకాలు ఆశించిన స్థాయిలో అందడం లేదని ముదిరాజ్ సంఘాలు చాలాకాలంగా వాదిస్తున్నాయి. ప్రత్యేక కార్పొరేషన్ ఏర్పాటు ద్వారా యువత, మహిళలు, నిరుద్యోగులు, చిన్న వ్యాపారులకు ప్రత్యక్షంగా ప్రయోజనం చేకూరుతుందని పట్టు కోట్ట చెంచు శ్రీనివాసులు ముదిరాజ్ అభిప్రాయపడుతున్నారు. ఆయన చేస్తున్న ఈ డిమాండ్‌కు రాష్ట్రవ్యాప్తంగా ముదిరాజ్ సంఘాలు, సామాజిక సంస్థల నుంచి బలమైన మద్దతు లభిస్తుంది..

టీడీపీ నిజంగానే ముదిరాజ్‌లను పక్కన పెడుతోందా? :

ఈ అంశంపై రాజకీయ వర్గాల్లో భిన్నాభిప్రాయాలు వ్యక్తమవుతున్నాయి. ముదిరాజ్ సంఘాలు, కొందరు నాయకులు తమకు తగిన ప్రాధాన్యత దక్కడం లేదని ఆరోపిస్తుండగా, తెలుగుదేశం పార్టీ మాత్రం బీసీలందరికీ సమాన అవకాశాలు కల్పిస్తున్నామని చెబుతోంది. అయితే కాపు, యాదవ, గౌడ, మత్స్యకార, వడ్డెర తదితర బీసీ వర్గాలతో పోలిస్తే ముదిరాజ్‌ల ప్రత్యేక సమస్యలు రాజకీయ చర్చల్లో పెద్దగా ప్రాధాన్యం పొందడం లేదన్న అభిప్రాయం వ్యక్తమవుతోంది. అందుకే ప్రత్యేక కార్పొరేషన్, ప్రత్యేక బడ్జెట్, రాజకీయ ప్రాతినిధ్యం కల్పించాలని ముదిరాజ్ సంఘాలు డిమాండ్ చేస్తున్నాయి.

జనాభాకు తగ్గ ప్రాధాన్యత దక్కడం లేదంటున్న బీసీ సంఘాలు :

రాష్ట్ర జనాభా సుమారు 6 కోట్లకు చేరువలో ఉండగా, అందులో బీసీలు 50 శాతానికి పైగా ఉన్నారని వివిధ అంచనాలు సూచిస్తున్నాయి. ఎస్సీలు సుమారు 17 శాతం, ఎస్టీలు 5 నుంచి 6 శాతం, మైనారిటీలు 9 నుంచి 10 శాతం వరకు ఉన్నట్లు సామాజిక అధ్యయనాలు పేర్కొంటున్నాయి.

బీసీ వర్గాల అభ్యున్నతి కోసం గతంలో యాదవ, గౌడ, మత్స్యకార, వడ్డెర, రజక, నాయీబ్రాహ్మణ, విశ్వబ్రాహ్మణ తదితర వర్గాలకు ప్రత్యేక కార్పొరేషన్లు ఏర్పాటు చేసి వివిధ సంక్షేమ పథకాలు అమలు చేశారు. అయితే ముదిరాజ్‌లకు ఇప్పటి వరకు ప్రత్యేక కార్పొరేషన్ ఏర్పాటు చేయలేదని సంఘాల ప్రతినిధులు ఆరోపిస్తున్నారు.

రాష్ట్రంలో 40 లక్షలకు పైగా ముదిరాజ్ ల జనాభా :

ముదిరాజ్ సంఘాల అంచనాల ప్రకారం రాష్ట్రంలో ఈ వర్గానికి చెందిన జనాభా 40 లక్షలకు పైగా ఉంది. జనాభా పరంగా గణనీయమైన స్థాయిలో ఉన్నప్పటికీ, రాజకీయ, ఆర్థిక, విద్యా రంగాల్లో తగిన ప్రాతినిధ్యం లభించడం లేదని వారు పేర్కొంటున్నారు. బీసీల అభ్యున్నతి గురించి మాట్లాడే ఏ రాజకీయ పార్టీ అయినా జనాభా, సామాజిక వెనుకబాటుతనం, ఆర్థిక పరిస్థితుల ఆధారంగా అన్ని వర్గాలకు సమాన అవకాశాలు కల్పించాల్సిన బాధ్యత ఉందని సంఘాల నాయకులు అంటున్నారు. ముదిరాజ్ సమాజం తమకు తగిన గుర్తింపు లభించడం లేదని భావిస్తే, ప్రభుత్వం, రాజకీయ పార్టీలు ఆ వర్గం సమస్యలను సమగ్రంగా అధ్యయనం చేసి తగిన చర్యలు తీసుకోవాల్సిన అవసరం ఉందని వారు అభిప్రాయపడుతున్నారు.

సామాజిక న్యాయం కోసం స్పష్టమైన నిర్ణయం అవసరం :

“బీసీలకు ప్రాధాన్యత” అనే నినాదం అన్ని బీసీ వర్గాలకు సమానంగా వర్తించినప్పుడే అది నిజమైన సామాజిక న్యాయంగా భావించబడుతుంది. ముదిరాజ్‌లకు ప్రత్యేక కార్పొరేషన్, తగిన నిధులు, రాజకీయ ప్రాతినిధ్యం, లక్ష్యబద్ధమైన సంక్షేమ కార్యక్రమాలపై ప్రభుత్వం స్పష్టమైన వైఖరి ప్రకటించాలని ముదిరాజ్ సంఘాలు డిమాండ్ చేస్తున్నాయి. ముదిరాజ్ సమాజం అభివృద్ధి, సాధికారత కోసం తీసుకునే నిర్ణయాలు కేవలం ఒక వర్గానికే కాకుండా రాష్ట్రంలోని సామాజిక సమతుల్యత, సమగ్ర అభివృద్ధికి కూడా దోహదపడతాయని సామాజిక విశ్లేషకులు అభిప్రాయపడుతున్నారు.

ముఖ్యమైన డిమాండ్లు :

ముదిరాజ్‌లకు ప్రత్యేక కార్పొరేషన్ ఏర్పాటు.. ప్రత్యేక బడ్జెట్ కేటాయింపు.. యువతకు స్వయం ఉపాధి రుణాలు.. మహిళలకు ప్రత్యేక ఆర్థిక సహాయ పథకాలు.. విద్యార్థులకు స్కాలర్‌షిప్‌లు, కోచింగ్ సదుపాయాలు.. రాజకీయ ప్రాతినిధ్యం పెంపు.. లక్ష్యబద్ధమైన సంక్షేమ కార్యక్రమాల అమలు..

ముదిరాజ్ సమాజానికి ప్రత్యేక కార్పొరేషన్ ఏర్పాటు చేయాలనే డిమాండ్ ఇప్పుడు సామాజిక న్యాయం, సమాన అవకాశాలు, ఆర్థిక సాధికారత అనే అంశాలతో రాష్ట్ర రాజకీయాల్లో చర్చనీయాంశంగా మారుతోంది.