- రూ.50 వేలు లంచం తీసుకుంటూ ఏఈ రెడ్ హ్యాండెడ్గా అరెస్ట్
హుజూరాబాద్ మున్సిపాలిటీలో అవినీతి వ్యవహారం వెలుగులోకి వచ్చింది. మున్సిపల్ శాఖలో అసిస్టెంట్ ఇంజనీర్ (ఏఇ)గా పనిచేస్తున్న నుసుం సుధాకర్ రెడ్డి బుధవారం రూ.50,000 లంచం తీసుకుంటూ ఏసీబీ అధికారులకు రెడ్ హ్యాండెడ్గా పట్టుబడ్డారు. ఏసీబీ అధికారులు తెలిపిన వివరాల ప్రకారం, ఒక కాంట్రాక్టర్ హుజూరాబాద్ మున్సిపాలిటీ పరిధిలో తుపాను నీటి కాలువల నిర్మాణ పనులను పూర్తి చేశారు. ఈ పనులకు సంబంధించిన ఫైనల్ బిల్లును ప్రాసెస్ చేయడం, మెజర్మెంట్ బుక్ లో నమోదు చేయడం కోసం సుధాకర్ రెడ్డి రూ.50,000 లంచం డిమాండ్ చేశారు.
దీనిపై బాధిత కాంట్రాక్టర్ అవినీతి నిరోధక శాఖ (ఏసీబీ) అధికారులను ఆశ్రయించగా, కరీంనగర్ ఏసీబీ యూనిట్ అధికారులు పక్కా ప్రణాళికతో వలపన్నీ పట్టుకున్నారు. హుజూరాబాద్లోని ఆర్టీసీ డిపో చౌరస్తా వద్ద బాధితుడి నుండి లంచం తీసుకుంటున్న సమయంలో సుధాకర్ రెడ్డిని అధికారులు పట్టుకున్నారు. అనంతరం నిందితుడి వద్ద నుండి లంచం సొమ్మును స్వాధీనం చేసుకుని, అరెస్ట్ చేశారు.నిందితుడిని కరీంనగర్లోని ఏసీబీ ప్రత్యేక కోర్టులో హాజరుపరచనున్నట్లు అధికారులు తెలిపారు.
ఈ ఘటనపై తదుపరి విచారణ కొనసాగుతోంది. ఇదిలా ఉండగా, ఏ ప్రభుత్వ ఉద్యోగి అయినా లంచం డిమాండ్ చేస్తే వెంటనే ఏసీబీ టోల్ ఫ్రీ నంబర్ 1064కు ఫిర్యాదు చేయాలని అధికారులు ప్రజలకు విజ్ఞప్తి చేశారు. ఫిర్యాదు చేసిన వారి వివరాలు పూర్తిగా గోప్యంగా ఉంచబడతాయని అధికారులు స్పష్టం చేశారు.