- మీ శరీరంలో అనేక మార్పులు వస్తాయి..
- గుండె పదిలంగా ఉంటుందంటున్న వైద్యులు..
ధూమపానం ఆరోగ్యానికి హానికరమని తెలిసినా, చాలా మంది రోజుకు ఒక్క సిగరెట్ మాత్రమే, అప్పుడప్పుడూ మాత్రమే తాగుతాను అనే కారణాలతో అలవాటును కొనసాగిస్తుంటారు. అయితే పొగాకు వినియోగానికి సురక్షితమైన పరిమితి అంటూ ఏదీ లేదని ఆరోగ్య నిపుణులు చెబుతున్నారు. ధూమపానం ఊపిరితిత్తులకే కాకుండా గుండె, రక్తనాళాలు, మెదడు, చర్మం సహా శరీరంలోని దాదాపు ప్రతి అవయవంపై ప్రభావం చూపుతుంది. అయితే ధూమపానం పూర్తిగా మానేసిన వెంటనే శరీరం తనను తాను పునరుద్ధరించుకునే ప్రక్రియను ప్రారంభిస్తుంది.
చివరి సిగరెట్ ఆర్పిన కొద్ది నిమిషాల నుంచే ఆరోగ్యపరమైన మార్పులు కనిపించడం మొదలవుతాయి. ధూమపానం మానేసిన కేవలం 20 నిమిషాల తర్వాత గుండె స్పందన రేటు, రక్తపోటు క్రమంగా సాధారణ స్థాయిలకు చేరడం ప్రారంభమవుతుంది. ఇది గుండెపై పడే ఒత్తిడిని తగ్గించడంలో కీలక పాత్ర పోషిస్తుంది. 12 గంటల లోపే రక్తంలో పేరుకుపోయిన కార్బన్ మోనాక్సైడ్ స్థాయిలు సాధారణ స్థితికి చేరుకుంటాయి.
దీంతో శరీరంలోని కణజాలాలకు ఆక్సిజన్ సరఫరా మెరుగుపడి అవయవాలు మరింత సమర్థంగా పనిచేయడం ప్రారంభిస్తాయి. కొన్ని వారాలు, నెలలు గడిచేకొద్దీ రక్తప్రసరణ మెరుగుపడుతుంది. ఊపిరితిత్తులు కూడా క్రమంగా కోలుకోవడం మొదలవుతుంది. గతంలో నడవడం, మెట్లు ఎక్కడం లేదా చిన్నపాటి వ్యాయామం చేయడం కూడా కష్టంగా అనిపించినవారికి ఈ పనులు సులభంగా మారుతాయి.