నాన్న అనిపించుకుంటేనే..
ఆయన జన్మకు పూర్ణత్వం
ఆలి ప్రసవ వేదనకు..
తల్లడిల్లు ఆయన హృదయం !
నవజాత శిశువు ఏడుపు వినగానే..
నాన్నలో ఉప్పొంగు ఆనంద భాష్పాలు
తండ్రి ప్రేమ అదృశ్య ప్రాణవాయువు
నాన్నతనం ఓ నిశ్శబ్ద తరంగం !
- Advertisement -
అమ్మ తొలి పలుకు, నడక నేర్పితే..
నాన్న చేయిపట్టి నడత నూరిపోస్తాడు
తెర ముందు అమ్మతనం పొగడ్త
తల్లిబిడ్డలకు నాన్నే అభయ హస్తం !
తగిన గుర్తింపు లేని పాత్ర నాన్న
కుటుంబానికి ఆయనే తోడు నీడ
కన్నీటిని చెమట వరదగా పారించి..
కుటుంబ పంటకు నీరు పోస్తాడు !
అమ్మ ఇంటి నవ్వుల దీపం
నాన్న ఆ దీపానికి కాలిపోయే వత్తి
కుటుంబానికి వెన్నెముక బాపు
నిత్యం శ్రమించే మానవ యంత్రం!
అపూర్వ పేగుబంధం అమ్మది
అద్వితీయ త్యాగబంధం నాన్నది
అమ్మనాన్నలు ఆది దేవతలు
ప్రత్యామ్నాయమే లేని పాత్రలు !
- Advertisement -