- చండూర్‌ సబ్‌స్టేషన్‌ ముట్టడించిన రైతులు
- 9–12 గంటల నిరంతర విద్యుత్‌కు డిమాండ్‌
- లో-వోల్టేజీ,ట్రిప్పింగ్‌తో మోటార్లు కాలిపోతున్నాయని ఆవేదన
పంట చేతికొచ్చే వేళ కరెంటు కష్టాలు రైతులను ఉక్కిరిబిక్కిరి చేస్తున్నాయి. విద్యుత్‌ సరఫరాలో తరచూ అంతరాయాలు, లో-వోల్టేజీ,ట్రిప్పింగ్‌ సమస్యలను వెంటనే పరిష్కరించాలని డిమాండ్‌ చేస్తూ మెదక్‌ జిల్లా చిలిపిచేడ్‌ మండలం చండూర్‌ గ్రామ రైతులు(Chandur Farmers Protest) మంగళవారం విద్యుత్‌ సబ్‌స్టేషన్‌ను ముట్టడించారు.రోజుకు 9 నుంచి 12 గంటలపాటు నిరంతరాయంగా విద్యుత్‌ సరఫరా చేయాలని డిమాండ్‌ చేశారు.
వరి పంటలు చివరి దశకు చేరుకున్న సమయంలో సాగునీరు అందించేందుకు విద్యుత్‌ కీలకంగా మారిందని రైతులు తెలిపారు. అయితే తరచూ సరఫరా నిలిచిపోవడం,లో-వోల్టేజీ,ట్రిప్పింగ్‌ సమస్యలతో వ్యవసాయ మోటార్లు సరిగా పనిచేయడం లేదని పేర్కొన్నారు. పలుమార్లు మోటార్లు కాలిపోవడంతో అదనపు వ్యయభారం పడుతోందని ఆవేదన వ్యక్తం చేశారు. కరెంటు వచ్చే సమయానికే అంతరాయాలు ఏర్పడటంతో పంటలకు సకాలంలో నీరు అందించలేకపోతున్నామని తెలిపారు.
ఫిర్యాదులు చేసినా ఫలితం లేదని ఆరోపణ
విద్యుత్‌ సమస్యలను ఇప్పటికే ఏఈ, ఏఈడీల దృష్టికి తీసుకెళ్లినా పూర్తిస్థాయిలో పరిష్కారం కాలేదని రైతులు ఆరోపించారు. పంట చివరి దశలో నీటి అవసరం అధికంగా ఉన్నందున ప్రస్తుతం విద్యుత్‌ సరఫరాలో ఏ చిన్న అంతరాయం ఏర్పడినా పంట దిగుబడిపై ప్రభావం పడే అవకాశం ఉందన్నారు.
పరిష్కారం లేకుంటే పెద్దఎత్తున ధర్నా
లో-వోల్టేజీ, ట్రిప్పింగ్‌, విద్యుత్‌ అంతరాయాలను తక్షణమే పరిష్కరించి వ్యవసాయానికి నిరంతర విద్యుత్‌ అందించాలని రైతులు కోరారు. సమస్య పరిష్కారం కాకపోతే పెద్దఎత్తున ధర్నా చేపడతామని హెచ్చరించారు. పంటలకు నష్టం వాటిల్లితే సంబంధిత అధికారులు బాధ్యత వహించాల్సి ఉంటుందని రైతులు పేర్కొన్నారు.(https://epaper.aadabhyderabad.in/)(Youtube)