- ఈ చిట్లకు మీకోసం..
- పూర్తిగా చదవండి..
బరువు తగ్గాలంటే కఠినమైన డైట్లు, గంటల తరబడి వ్యాయామం చేయాల్సిందేనని చాలామంది భావిస్తుంటారు. అయితే శరీరంలో మార్పు తీసుకురావడానికి రహస్యమేమీ లేదని, ప్రతిరోజూ ఒకే విధమైన ఆరోగ్యకరమైన అలవాట్లను క్రమం తప్పకుండా పాటించడమే అసలు విజయమని ఫిట్నెస్ నిపుణులు చెబుతున్నారు. ముఖ్యంగా బరువు తగ్గి, మళ్లీ పెరగకుండా ఉండాలంటే తాత్కాలిక పరిష్కారాల కంటే దీర్ఘకాలం కొనసాగించగల జీవనశైలిని అలవాటు చేసుకోవడం ఎంతో ముఖ్యం. రోజుకు సుమారు నాలుగు లీటర్ల వరకు నీరు తాగడం వల్ల ఆకలి నియంత్రణలో ఉండటంతోపాటు జీర్ణక్రియ మెరుగుపడుతుంది.
వ్యాయామ సమయంలో శరీర పనితీరు మెరుగుపడటమే కాకుండా చర్మ ఆరోగ్యానికి కూడా ఇది మేలు చేస్తుంది. అలాగే అనవసరంగా ఏదో ఒకటి తినాలనే కోరికను తగ్గించడంలో కూడా సహాయపడుతుంది. ప్రతిరోజూ స్క్వాట్స్ వంటి దిగువ శరీర భాగానికి సంబంధించిన వ్యాయామాలు చేయడం వల్ల కాళ్ల కండరాలు బలపడతాయి. క్యాలరీలు ఖర్చవడంతోపాటు శరీర కదలికలు మెరుగుపడి స్టామినా కూడా పెరుగుతుంది. అయితే ఒకేసారి 200 స్క్వాట్స్ చేయడం ప్రతి ఒక్కరికీ సరిపోదు. శారీరక సామర్థ్యాన్ని బట్టి క్రమంగా సంఖ్యను పెంచుకోవడం సురక్షితం.
రోజువారీ వ్యాయామంలో పుష్అప్స్ చేర్చడం వల్ల ఛాతీ, భుజాలు, చేతులు, కోర్ కండరాలు బలపడతాయి. కొత్తగా ప్రారంభించే వారు తక్కువ సంఖ్యతో మొదలుపెట్టి, శరీరం అలవాటు పడిన తర్వాత క్రమంగా పెంచడం మంచిది. కండరాల సంరక్షణకు, బరువు తగ్గే సమయంలో కండరాల నష్టం తగ్గించేందుకు ప్రోటీన్ కీలక పాత్ర పోషిస్తుంది. గుడ్లు, చికెన్ బ్రెస్ట్, పప్పులు, శనగలు, పెరుగు వంటి ప్రోటీన్ అధికంగా ఉండే ఆహారాలను అవసరానికి అనుగుణంగా తీసుకోవడం వల్ల ఎక్కువసేపు కడుపు నిండిన భావన కలుగుతుంది. అయితే రోజూ ఎనిమిది గుడ్లు, 300 గ్రాముల చికెన్ ప్రతి ఒక్కరికీ అవసరం కాదు. వ్యక్తిగత ఆరోగ్యం, వయస్సు, శారీరక శ్రమను బట్టి ప్రోటీన్ అవసరం మారుతుంది.