Papannapet Government Junior College | పేరు బోర్డు లేని ప్రభుత్వ కళాశాల!

• పాపన్నపేట ప్రభుత్వ జూనియర్ కళాశాలలో వింత పరిస్థితి
• సమాచార హక్కు బోర్డుకూ చోటేది?
• బోర్డు లేకుండా కళాశాలను గుర్తించేదెలా?
• ఆకస్మిక తనిఖీకి అధికారులు వస్తే.. పరిస్థితి ఏంటి?

ప్రభుత్వ విద్యాసంస్థ అంటే ప్రజలకు స్పష్టంగా కనిపించేలా సంస్థ పేరు, వివరాలతో కూడిన బోర్డు ఉండటం కనీస బాధ్యత. అయితే పాపన్నపేట మండల కేంద్రంలోని ప్రభుత్వ జూనియర్ కళాశాలలో (Papannapet Government Junior College) మాత్రం ఈ ప్రాథమిక నిబంధనకే చోటు లేకుండా పోయింది. కళాశాల పేరు తెలిపే బోర్డు కనిపించకపోవడంతో పాటు, సమాచార హక్కు చట్టానికి సంబంధించిన వివరాలను ప్రజలకు తెలియజేయాల్సిన బోర్డు కూడా లేకపోవడం తీవ్ర చర్చకు దారితీస్తోంది.

ప్రభుత్వ సంస్థల్లో పారదర్శకత, జవాబుదారీతనం, ప్రజలకు సమాచారం అందుబాటులో ఉంచడం కీలకమైన అంశాలు. కానీ పాపన్నపేట ప్రభుత్వ జూనియర్ కళాశాలలో మాత్రం సంస్థను గుర్తించే కనీస సమాచారం కూడా ప్రదర్శించకపోవడం యాజమాన్య నిర్లక్ష్యానికి నిదర్శనమని స్థానికులు విమర్శిస్తున్నారు. విద్యార్థులు, తల్లిదండ్రులు, ప్రజలు నిత్యం రాకపోకలు సాగించే ప్రదేశంలో కళాశాల పేరు కూడా కనిపించకపోవడం అధికారుల పర్యవేక్షణపై అనేక ప్రశ్నలు లేవనెత్తుతోంది. మండల కేంద్రంలో ఉన్నప్పటికీ ప్రభుత్వ జూనియర్ కళాశాలకు (Papannapet Government Junior College) పేరు బోర్డు లేకపోవడంతో తల్లిదండ్రులు, ఇతర ప్రాంతాల నుంచి వచ్చే సందర్శకులు తీవ్ర ఇబ్బందులు ఎదుర్కొంటున్నారు. కళాశాల భవనం ఏదో తెలుసుకోవడానికి స్థానికులను అడగాల్సిన పరిస్థితి నెలకొంది. ప్రభుత్వ నిధులతో నిర్వహిస్తున్న విద్యాసంస్థకు కనీస గుర్తింపు బోర్డు ఏర్పాటు చేయకపోవడం శోచనీయం.

సమాచార హక్కు బోర్డు ఎక్కడ?
ప్రభుత్వ కార్యాలయాలు, విద్యాసంస్థల్లో సమాచార హక్కు చట్టానికి సంబంధించిన వివరాలు, ప్రజా సమాచార అధికారి పేరు, సంప్రదింపు వివరాలు ప్రజలకు అందుబాటులో ఉంచాల్సి ఉంటుంది. అయితే ఈ కళాశాలలో అలాంటి బోర్డు కనిపించకపోవడంతో సమాచార హక్కు చట్టం అమలుపై అనుమానాలు వ్యక్తమవుతున్నాయి. కనీసం ప్రజలకు అవసరమైన సమాచారాన్ని ప్రదర్శించకపోవడం వల్ల కళాశాల నిర్వహణపై అనుమానాలు మరింత పెరుగుతున్నాయి.

అధికారులు ఆకస్మికంగా వస్తే?
ఉన్నతాధికారులు ఆకస్మిక తనిఖీల కోసం కళాశాలకు వచ్చినప్పుడు.. బయట నుంచే ఇది ప్రభుత్వ జూనియర్ కళాశాల అని గుర్తించే పరిస్థితి లేకపోవడం అధికారుల దృష్టికి రావాల్సిన అంశం. సంస్థ పేరు తెలిపే బోర్డు లేకపోవడం, సమాచార హక్కు బోర్డు కనిపించకపోవడం వంటి విషయాలు తనిఖీల్లో ఎందుకు గుర్తించలేదని స్థానికులు ప్రశ్నిస్తున్నారు.విద్యార్థుల భవిష్యత్తుతో ముడిపడి ఉన్న విద్యాసంస్థ నిర్వహణలో ఇలాంటి ప్రాథమిక అంశాలను కూడా పట్టించుకోకపోవడం బాధ్యతారాహిత్యమేనని వారు అంటున్నారు. కళాశాల భవనం, పరిసరాలు, మౌలిక వసతులు, పరిపాలనా వివరాలపై అధికారులు క్రమం తప్పకుండా పర్యవేక్షణ చేయాల్సిన అవసరం ఉందని సూచిస్తున్నారు.

తక్షణమే బోర్డులు ఏర్పాటు చేయాలి
కళాశాల పేరుతో స్పష్టమైన, అందరికీ కనిపించేలా బోర్డు ఏర్పాటు చేయడంతో పాటు ఆర్టిఐ చట్టానికి సంబంధించిన పూర్తి వివరాలను ప్రదర్శించే బోర్డును కూడా వెంటనే ఏర్పాటు చేయాలని స్థానికులు కోరుతున్నారు. ఈ వ్యవహారంపై జిల్లా ఇంటర్మీడియట్ విద్యాశాఖ ఉన్నతాధికారులు ఎలా స్పందిస్తారో వేచి చూడాల్సిందే. ఆర్టిఐ బోర్డు విషయమై కళాశాల ప్రిన్సిపల్ నర్సింలు ను అడగ్గా బోర్డు ఇదివరకే ఉంచామని, దానిపై ఇతర పోస్టర్లు అతికించడం వలన కనిపించకుండా పోయిందని “ఆదాబ్” ప్రతినిధికి తెలపడం గమనార్హం. (https://epaper.aadabhyderabad.in/) (Youtube)