- భారత్లో ప్రారంభ ధర రూ.1,39,900 ఉండొచ్చని అంచనా..
- ఆతృతగా ఎదురుచూస్తున్న ఐఫోన్ అభిమానులు..
ప్రముఖ టెక్ దిగ్గజం యాపిల్ తమ తదుపరి తరం ఐఫోన్ల లాంచ్కు రంగం సిద్ధం చేసింది. ప్రపంచవ్యాప్తంగా ఎంతో ఆసక్తిగా ఎదురుచూస్తున్న ఐఫోన్ 18 ప్రో, ఐఫోన్ 18 ప్రో మ్యాక్స్ మోడళ్లను ఆవిష్కరించేందుకు ప్రత్యేక ఈవెంట్ను ప్రకటించింది. సెప్టెంబర్ 9న కాలిఫోర్నియాలోని యాపిల్ పార్క్లో ఉన్న స్టీవ్ జాబ్స్ థియేటర్లో ఈ కార్యక్రమం జరగనుంది. ఇప్పటికే ఈ కొత్త ఫోన్లకు సంబంధించిన ఫీచర్లు, ధరపై ఆన్లైన్లో ఊహాగానాలు జోరుగా సాగుతున్నాయి.
యాపిల్ ప్రకటించిన షెడ్యూల్ ప్రకారం.. సెప్టెంబర్ 9న పసిఫిక్ కాలమానం ప్రకారం ఉదయం 10 గంటలకు, అంటే భారత కాలమానం ప్రకారం రాత్రి 10:30 గంటలకు ఈవెంట్ ప్రారంభమవుతుంది. ఈ కార్యక్రమంలోనే ఐఫోన్ 18 ప్రో, ప్రో మ్యాక్స్లను అధికారికంగా పరిచయం చేస్తారని టెక్ వర్గాలు భావిస్తున్నాయి. ప్రముఖ టెక్ వెబ్సైట్ మ్యాక్రూమర్స్ నివేదిక ప్రకారం, ఈవెంట్ అనంతరం సెప్టెంబర్ 18 నుంచి ప్రో మోడళ్ల అమ్మకాలు ప్రారంభం కావచ్చని తెలుస్తోంది.
అయితే, దీనిపై యాపిల్ నుంచి అధికారిక ప్రకటన రావాల్సి ఉంది. ఈసారి ప్రో మోడళ్లలో పనితీరును తర్వాతి స్థాయికి తీసుకెళ్లేందుకు యాపిల్ సరికొత్త ఏ20 ప్రో చిప్ను ఉపయోగిస్తున్నట్లు సమాచారం. మ్యాక్రూమర్స్ కథనం ప్రకారం.. ఈ చిప్ను 2 నానోమీటర్ (nm) ప్రక్రియతో తయారు చేస్తున్నారు. దీనివల్ల ఫోన్ వేగంగా పనిచేయడమే కాకుండా, విద్యుత్ వినియోగం కూడా తగ్గి బ్యాటరీ లైఫ్ గణనీయంగా మెరుగుపడే అవకాశం ఉంది. ప్రో మ్యాక్స్ మోడల్లో మరింత పెద్ద బ్యాటరీ, మెరుగైన చిప్ ఉండొచ్చని అంచనా వేస్తున్నారు. అయితే, బ్యాటరీ సామర్థ్యంపై యాపిల్ ఇంకా ఎలాంటి వివరాలు వెల్లడించలేదు.
ఐఫోన్ 18 ప్రో సిరీస్లో కెమెరా వ్యవస్థ ప్రధాన ఆకర్షణగా నిలవనుంది. టామ్స్ గైడ్ నివేదిక ప్రకారం.. ఈ ఫోన్లో 48 మెగాపిక్సెల్ సెన్సార్లతో కూడిన ట్రిపుల్ రియర్ కెమెరా సెటప్ (ప్రధాన, అల్ట్రా-వైడ్, టెలిఫోటో) ఉండనుంది. అంతేగాక యాపిల్ ఈసారి ‘వేరియబుల్ అపెర్చర్’ టెక్నాలజీని పరిచయం చేయవచ్చని తెలుస్తోంది. ఈ ఫీచర్ ద్వారా కెమెరా లెన్స్లోకి ప్రవేశించే కాంతిని నియంత్రించవచ్చు. ఫలితంగా విభిన్న లైటింగ్ పరిస్థితుల్లోనూ అద్భుతమైన ఫొటోలు తీయడం సాధ్యమవుతుంది.
అయితే, కొన్ని అత్యాధునిక కెమెరా ఫీచర్లు కేవలం ప్రో మ్యాక్స్ మోడల్కు మాత్రమే పరిమితం కావచ్చని అంచనా. మ్యాక్వరల్డ్ నివేదిక ప్రకారం.. ఐఫోన్ 18 ప్రో, ప్రో మ్యాక్స్లు డార్క్ చెర్రీ, లైట్ బ్లూ, డార్క్ గ్రే, సిల్వర్ అనే నాలుగు ఆకర్షణీయమైన రంగుల్లో అందుబాటులోకి రావచ్చు. ఇక, ధర విషయానికొస్తే.. భారత్లో ఐఫోన్ 18 ప్రో ప్రారంభ ధర సుమారు రూ.1,39,900 ఉండొచ్చని స్మార్ట్ప్రిక్స్, బీబమ్ గ్యాడ్జెట్స్ వంటి వెబ్సైట్లు అంచనా వేశాయి. అయితే, ఇది కేవలం లీక్ల ఆధారంగా వెలువడిన సమాచారం మాత్రమే. అసలు ధరలు, ఫీచర్లు, రంగుల పూర్తి వివరాలను యాపిల్ సెప్టెంబర్ 9న జరిగే ఈవెంట్లో అధికారికంగా వెల్లడించనుంది.