- సర్వ దర్శనానికి 18 గంటలు సమయం..
- శిలాతోరణం వరకు క్యూ లైన్స్..
తిరుమల శ్రీవారి దర్శనానికి భక్తులు భారీగా తరలి వస్తుండడంతో కొండపై రద్దీ వాతావరణం కొనసాగుతోంది. శ్రీవారి సర్వదర్శనానికి సుమారు 18 గంటల సమయం పడుతోందని అధికారులు తెలిపారు. వైకుంఠం క్యూ కాంప్లెక్స్లోని అన్ని కంపార్ట్మెంట్లు నిండిపోయి, క్యూలైన్లు వెలుపల శిలాతోరణం వరకు విస్తరించాయి. నిన్న మంగళవారం (జూలై 14) ఒక్కరోజే 75,485 మంది భక్తులు స్వామివారిని దర్శించుకున్నారు.
30,939 మంది భక్తులు తలనీలాలు సమర్పించగా, హుండీ ద్వారా రూ. 4.36 కోట్ల ఆదాయం వచ్చినట్లు తిరుమల తిరుపతి దేవస్థానం (టీటీడీ) వెల్లడించింది. అదేవిధంగా, టీటీడీ రికార్డు స్థాయిలో 3.70 లక్షల లడ్డూలను విక్రయించింది. దాదాపు 2.99 లక్షల మంది భక్తులకు అన్నప్రసాదం అందించారు. వైద్య సేవలు పొందిన వారి సంఖ్య 3,928గా నమోదైంది. భక్తుల రద్దీ దృష్ట్యా, సర్వదర్శనం టోకెన్లు లేని వారు దర్శనానికి 15 నుంచి 18 గంటల వరకు వేచి ఉండాల్సి వస్తోందని టీటీడీ అధికారులు పేర్కొన్నారు. క్యూలైన్లలో వేచి ఉన్న భక్తులకు అవసరమైన తాగునీరు, ఆహారం వంటి సౌకర్యాలను అందిస్తున్నట్లు తెలిపారు.