హైదరాబాద్: స్థానిక సంస్థల ఎన్నికలకు సంబంధించి రాష్ట్ర ప్రభుత్వం శుక్రవారం ఒక కీలకమైన జీవో జారీ చేసింది. ఈ జీవో ప్రకారం, స్థానిక సంస్థలలోని సీట్లలో, పదవులలో బీసీలకు 42 శాతం రిజర్వేషన్లు(BC reservations) కల్పిస్తారు.
చాలా కాలంగా పెండింగ్లో ఉన్న స్థానిక సంస్థల ఎన్నికల నిర్వహణకు ఇప్పుడు ఈ ఆదేశాలు మార్గం సుగమం చేశాయి. ఈ ఎన్నికలు పూర్తి చేసి ఫలితాలు ప్రకటించడానికి సెప్టెంబర్ 30ని గడువుగా హైకోర్టు ఇప్పటికే నిర్ణయించింది. ఈ ఎన్నికల ఏర్పాట్లపై రాష్ట్ర ఎన్నికల కమిషన్ శనివారం ఒక సమావేశం నిర్వహించనుంది. ఈ సమావేశంలో ముఖ్య కార్యదర్శి రామకృష్ణారావు, జిల్లా కలెక్టర్లు, ఎస్పీలు పాల్గొంటారు. రిజర్వేషన్లు ఖరారైన తర్వాత,ఎన్నికల నోటిఫికేషన్ విడుదలయ్యే అవకాశం ఉంది.
రాష్ట్రంలో మొత్తం 12,760 గ్రామ పంచాయితీలు, 1,12,534 వార్డులకు ఎన్నికలు జరగాలి. అలాగే 565 జెడ్పిటీసీలు, 5,763 ఎంపీటీసీలకు కూడా ఎన్నికలు నిర్వహించాలి. ఆ తర్వాతా 565 మండల పరిషత్ లు , 31 జిల్లా పరిషత్ ల ఛైర్మన్ల ఎన్నికలు ఉంటాయి.