- వైద్య నిపుణులు సూచిస్తున్న ఆరోగ్య సూత్రాలు..
వేగవంతమైన ఆధునిక జీవనశైలిలో ఆరోగ్యంపై శ్రద్ధ పెట్టడం చాలామందికి కష్టంగా మారుతోంది. అయితే, మన శరీరం కొన్ని సంఖ్యల రూపంలో ఆరోగ్యం గురించి స్పష్టమైన సంకేతాలు ఇస్తుంది. ఈ కీలక ఆరోగ్య సూచికలను ఎప్పటికప్పుడు గమనిస్తూ ఉంటే, భవిష్యత్తులో ఎదురయ్యే పెద్ద ఆరోగ్య సమస్యలను ముందుగానే పసిగట్టి నివారించవచ్చు. వైద్య నిపుణులు సూచిస్తున్న ప్రకారం ప్రతి ఒక్కరూ తెలుసుకోవాల్సిన 11 ముఖ్యమైన ఆరోగ్య సూచికలు ఇక్కడ ఉన్నాయి.
1) రక్తపోటు : సాధారణంగా రక్తపోటు 120/80 ఎంఎం హెచ్ జీ స్థాయిలో ఉండాలి. అధిక రక్తపోటు గుండెపోటు, పక్షవాతం (స్ట్రోక్), కిడ్నీ వ్యాధుల ప్రమాదాన్ని గణనీయంగా పెంచుతుంది. 2) గుండె స్పందన రేటు : ఆరోగ్యవంతుల గుండె నిమిషానికి 60 నుంచి 100 సార్లు కొట్టుకుంటుంది. ఇది గుండె సరిగ్గా పనిచేస్తోందని సూచిస్తుంది. 3) కొలెస్ట్రాల్ : మొత్తం కొలెస్ట్రాల్ స్థాయి 200 ఎంజీ/డీఎల్. కంటే తక్కువగా ఉండాలి.
4) చెడు కొలెస్ట్రాల్ : ఇది 100 ఎంజీ/డీఎల్. కంటే తక్కువగా ఉండాలి. అధిక ఎల్ డీ ఎల్ రక్తనాళాల్లో పేరుకుపోయి గుండె జబ్బులకు దారితీస్తుంది. 5) మంచి కొలెస్ట్రాల్ : పురుషులలో 40 ఎంజీ/డీఎల్., మహిళల్లో 50 ఎంజీ/డీఎల్. కంటే ఎక్కువగా ఉండాలి. ఇది గుండెను రక్షించడంలో సహాయపడుతుంది. 6) పరగడుపున రక్తంలో చక్కెర : ఈ విలువ 70-99 ఎంజీ/డీఎల్.మధ్య ఉండాలి. దీనికి మించి ఉంటే మధుమేహం వచ్చే ప్రమాదం ఉంది. 7) హెచ్.బీ.ఏ. 1 సి : ఇది 5.7 శాతం కంటే తక్కువగా ఉండాలి. గత 2-3 నెలల సగటు రక్తంలో చక్కెర స్థాయిని ఇది తెలియజేస్తుంది. 8) బాడీ మాస్ ఇండెక్స్ : ఇది 18.5 నుంచి 24.9 కేజీ/ ఎం స్క్యైర్ మధ్య ఉండటం ఆరోగ్యకరమైన బరువుకు సంకేతం.
9) నడుము చుట్టుకొలత : పురుషులలో 90 సెం.మీ., మహిళల్లో 80 సెం.మీ. కంటే తక్కువ ఉండాలి. పొట్ట చుట్టూ కొవ్వు పెరగడం మధుమేహం, గుండె జబ్బుల ప్రమాదాన్ని సూచిస్తుంది. 10) రక్తంలో ఆక్సిజన్ స్థాయి : ఇది 95శాతం నుంచి 100శాతం మధ్య ఉండాలి. శరీర అవయవాలకు తగినంత ఆక్సిజన్ అందుతున్నట్లు ఇది నిర్ధారిస్తుంది. 11) శరీర ఉష్ణోగ్రత : సాధారణంగా 36.5° సి – 37.3°సి మధ్య ఉంటుంది. జ్వరం లేదా ఇన్ఫెక్షన్లను గుర్తించడానికి ఇది ప్రాథమిక సూచిక.
ఈ ఆరోగ్య సంఖ్యలను నిర్లక్ష్యం చేయకుండా క్రమం తప్పకుండా పరీక్షించుకోవడం చాలా ముఖ్యం. ముందస్తు జాగ్రత్తతో కూడిన నివారణే ఉత్తమ చికిత్స అని గుర్తుంచుకోవాలి. ఈ సమాచారాన్ని మీ కుటుంబ సభ్యులు, స్నేహితులతో పంచుకుని వారిలో కూడా ఆరోగ్యంపై అవగాహన పెంచడం మనందరి బాధ్యత.