ప్రభుత్వ ఆస్పత్రిలో దారుణం చిన్నారులకు వికటించిన వైద్యం!

• ఒక్కసారిగా 17 మంది పిల్లలకు అస్వస్థత..ఐసీయూకు తరలింపు

​వైద్యం కోసం ఆసుపత్రిలో చేరిన చిన్నారులకు చికిత్స అందించిన వెంటనే తీవ్ర అస్వస్థత కలగడం నల్గొండ జిల్లాలోని నాగార్జునసాగర్ ప్రాంతంలో కలకలం సృష్టించింది. కమల నెహ్రూ ప్రభుత్వ ఆసుపత్రిలోని పిల్లల వార్డులో శుక్రవారం రాత్రి ఈ ఘటన చోటు చేసుకుంది. వైద్య సిబ్బంది నిర్లక్ష్యం కారణంగానే ఈ పరిస్థితి తలెత్తిందని, దీనిపై తక్షణమే చర్యలు తీసుకోవాలని చిన్నారుల తల్లిదండ్రులు ఆందోళన వ్యక్తం చేస్తున్నారు. సాగర్ ఏరియా కమలా ఆసుపత్రిలోని పిల్లల వార్డులో చికిత్స పొందుతున్న 17 మంది చిన్నారులకు శుక్రవారం రాత్రి డ్యూటీలో ఉన్న సిబ్బంది గ్లూకోజ్, ఇంజక్షన్లు ఇచ్చారు.

అయితే, ఆ మందులు ఇచ్చిన కొద్దిసేపటికే పిల్లల్లో తీవ్రమైన మార్పులు కనిపించడం మొదలైంది. చిన్నారులందరూ విపరీతమైన చలిజ్వరం, వాంతులు, విరోచనాలతో బాధపడటం ప్రారంభించారు.
​పరిస్థితి ఒక్కసారిగా చేయి దాటుతుండటంతో ఆసుపత్రి సిబ్బంది, డాక్టర్లు అప్రమత్తమయ్యారు. వెంటనే స్పందించి, అస్వస్థతకు గురైన ఆ 17 మంది చిన్నారులను హుటాహుటిన ఇంటెన్సివ్ కేర్ యూనిట్ (ఐసీయూ)కు తరలించి అత్యవసర వైద్యం అందిస్తున్నారు. ప్రస్తుతం పిల్లల ఆరోగ్య పరిస్థితిపై పూర్తి వివరాలు తెలియాల్సి ఉంది.

​నిర్లక్ష్యంపై తీవ్ర ఆరోపణలు..

​వైద్యం వికటించిన ఘటనతో ఆసుపత్రి ప్రాంగణంలో తీవ్ర ఉద్రిక్తత నెలకొంది. తమ పిల్లలకు సరైన వైద్యం అందించడంలో డ్యూటీ డాక్టర్, ఇతర సిబ్బంది ఘోరంగా నిర్లక్ష్యం వహించారని చిన్నారుల తల్లిదండ్రులు ఆరోపిస్తున్నారు. నాణ్యతలేని మందులు ఇవ్వడం లేదా చికిత్సలో లోపం వల్లే ఇలా జరిగిందని వారు భయాందోళన వ్యక్తం చేస్తున్నారు.

నిర్లక్ష్యంగా వ్యవహరించిన డ్యూటీ డాక్టర్, స్టాఫ్‌పై ఉన్నతాధికారులు తక్షణమే కఠిన చర్యలు తీసుకోవాలని, ఈ ఘటనకు కారణమైన వారిని వెంటనే సస్పెండ్ చేయాలని తల్లిదండ్రులు, స్థానికులు తీవ్రంగా డిమాండ్ చేస్తున్నారు. పూర్తిస్థాయి విచారణ జరిపి, తమ పిల్లలకు మెరుగైన వైద్యం అందించాలని వారు కోరుతున్నారు. ఈ ఘటనపై జిల్లా వైద్య ఆరోగ్య శాఖ అధికారులు ఎలా స్పందిస్తారో చూడాలి.