సరూర్నగర్ సబ్-రిజిస్ట్రార్ కార్యాలయంలో జరిగిన రిజిస్ట్రేషన్లపై అనుమానాలు.. నాదర్గుల్లో అక్రమ లేఅవుట్ కలకలం..
- హెచఎండీఏ, జీహెచఎంసీ అనుమతులు లేని లేఅవుట్
- వందలాది ప్లాట్ల రిజిస్ట్రేషన్లపై అనుమానాలు
- అధికారుల అండదండలతోనే రిజిస్ట్రేషన్లు..?
- తెలంగాణ ప్రభుత్వానికి భారీ ఆదాయ నష్టం
- రిజిస్ట్రేషన్ ప్రక్రియపై విచారణకు డిమాండ్
- బాధ్యులపై చర్యలు తీసుకోవాలని విజ్ఞప్తి
నగర శివారు లోని నాదర్గుల్ గ్రామంలో హెచఎండీఏ లేదా జీహెచఎంసీ అనుమతులు లేని ఒక అనధికారిక లేఅవుట్ వ్యవహారం వెలుగు లోకి వచ్చింది. ఎటువంటి చట్టబద్ధమైన అనుమతులు లేకుండానే భూమిని ప్లాట్లుగా విభజించి విక్రయిస్తున్నట్లు స్థానికంగా తీవ్ర చర్చనీయాంశమైంది. హెచఎండీఏ, జీహెచఎంసీ నిబంధనల ప్రకారం లేఅవుట్ అభివృద్ధికి ముందు తప్పనిసరిగా అనుమతులు పొందాలి. అయితే, నాదర్గుల్లో ఈ నిబంధనలను పూర్తిగా పక్కన పెట్టి, అనధికారికంగా లేఅవుట్ ఏర్పాటు చేసినట్లు తెలుస్తోంది.
ఆశ్చర్యకరమైన విషయం ఏమిటంటే, అనుమతులు లేని ఈ లేఅవుట్లోని ప్లాట్లకు సరూర్నగర్ సబ్-రిజిస్ట్రార్ కార్యాలయంలో వందలాది రిజిస్ట్రేషన్లు జరిగినట్లు రికార్డులు వెల్లడిస్తున్నాయి. ఎటువంటి లేఅవుట్ పర్మిషన్లు లేకుండా ఈ రిజిస్ట్రేషన్లు ఏ ప్రాతిపదికన జరిగాయనేది ఇప్పుడు పెద్ద ప్రశ్నగా మారింది. లేఅవుట్ అనుమతులు లేకపోవడంతో, ప్రభుత్వానికి రావాల్సిన లేఅవుట్ ఛార్జీలు, డెవలప్మెంట్ ఫీజులు, ఓపెన్ స్పేస్ ఛార్జీలు మరియు ఇతర స్క్రూటినీ ఫీజులు ఖజానాకు చేరలేదు.
తద్వారా ప్రభుత్వానికి భారీ స్థాయిలో ఆదాయ నష్టం జరిగినట్లు తెలుస్తోంది. ప్రభుత్వ నిబంధనలకు విరుద్ధంగా జరిగిన ఈ లావాదేవీల వల్ల, అమాయక కొనుగోలుదారులు తీవ్రంగా నష్టపోయే ప్రమాదం ఉంది. అప్రూవల్ లేని ఈ ప్లాట్లలో భవిష్యత్తులో గృహ నిర్మాణ అనుమతులు పొందడం, బ్యాంకు రుణాలు తీసుకోవడం మరియు ఇతర ప్రభుత్వ సేవలు పొందే అవకాశం ఉండదు.
ఈ వ్యవహారంపై సమగ్ర విచారణ జరిపించాలని కోరుతూ డిమాండ్లు వస్తున్నాయి. ముఖ్యంగా సరూర్నగర్ సబ్-రిజిస్ట్రార్ కార్యాలయంలో జరిగిన రిజిస్ట్రేషన్ల చట్టబద్ధతపై విజిలెన్స్ లేదా ఉన్నతస్థాయి విచారణ చేపట్టాలని, బాధ్యులైన డెవలపర్లు, భూ యజమానులు మరియు రిజిస్ట్రేషన్ అధికారులపై కఠిన చర్యలు తీసుకోవాలని ఫిర్యాదుదారులు డిమాండ్ చేస్తున్నారు. ఈ అక్రమ లేఅవుట్ల దందా వెనుక ఉన్న ‘రెగ్యులేటరీ ఆర్బిట్రేజ’ (నిబంధనలను ఉద్దేశపూర్వకంగా తప్పించుకోవడం) చర్యలపై అధికారులు ఏవిధంగా స్పందిస్తారనేది వేచి చూడాలి.