- దేశీయ ఆటోమొబైల్ రంగం బలమైన వృద్ధి నమోదు..
- జూలై నెలలో అత్యుత్తమ అమ్మకాలు..
దేశీయ ఆటోమొబైల్ రంగం జులైలో మరోసారి బలమైన వృద్ధిని నమోదు చేసింది. ఎస్యూవీలకు పెరుగుతున్న డిమాండ్, ఎలక్ట్రిక్ వాహనాల అమ్మకాల్లో జోరు, ఎగుమతుల వృద్ధితో ప్రముఖ కార్ల తయారీ సంస్థలు భారీ అమ్మకాలు నమోదు చేశాయి. పలువురు తయారీదారులు తమ చరిత్రలోనే అత్యుత్తమ జులై అమ్మకాలను సాధించారు.
జులైలో హ్యుందాయ్ మోటార్ ఇండియా మొత్తం 75,360 వాహనాలు విక్రయించి సంస్థ ఆవిర్భావం తర్వాత అత్యధిక నెలవారీ అమ్మకాలను నమోదు చేసింది. ఇది గత ఏడాదితో పోలిస్తే 25.4 శాతం ఎక్కువ. దేశీయ మార్కెట్లో 54,210 యూనిట్లు విక్రయించగా, ఎగుమతులు 21,150 యూనిట్లకు చేరాయి. ఇది గత 100 నెలల్లో అత్యధిక ఎగుమతులుగా కంపెనీ పేర్కొంది.
కియా ఇండియా కూడా జులైలో రికార్డు స్థాయి టోకు విక్రయాలను నమోదు చేసింది. మొత్తం 28,200 వాహనాలు డీలర్లకు పంపిణీ చేసింది. ఇది ఏడాది క్రితంతో పోలిస్తే 27.4 శాతం పెరుగుదల. ఈ ఏడాది జనవరి నుంచి జులై వరకు కంపెనీ మొత్తం 1,91,949 వాహనాలు విక్రయించింది.
టాటా మోటార్స్ ప్యాసింజర్ వెహికల్స్ జులైలో దేశీయ, అంతర్జాతీయ మార్కెట్లలో కలిపి 63,760 వాహనాలు విక్రయించింది. గత ఏడాదితో పోలిస్తే ఇది 59 శాతం వృద్ధి. దేశీయ అమ్మకాలు 62,611 యూనిట్లకు చేరాయి. ముఖ్యంగా ఎలక్ట్రిక్ వాహనాల అమ్మకాలు రెట్టింపుకు పైగా పెరిగాయి. గత ఏడాది 7,124 యూనిట్లు విక్రయించగా, ఈసారి 15,217 ఈవీలు అమ్ముడయ్యాయి.
మహీంద్రా అండ్ మహీంద్రా మొత్తం వాహన అమ్మకాల్లో 26 శాతం వృద్ధితో 1,03,860 యూనిట్లు విక్రయించింది. ఇందులో కంపెనీకి కీలకమైన యుటిలిటీ వాహనాల దేశీయ అమ్మకాలు 20 శాతం పెరిగి 60,048 యూనిట్లకు చేరాయి. నిస్సాన్ ఇండియా కూడా జులైలో రికార్డు స్థాయి టోకు విక్రయాలను నమోదు చేసింది. మొత్తం 9,339 వాహనాలు పంపిణీ చేసింది. దేశీయ టోకు అమ్మకాలు 218 శాతం పెరిగి 4,518 యూనిట్లకు చేరాయి. కొత్త టెక్టాన్ ఎస్యూవీ విడుదలతో ఈ వృద్ధి సాధ్యమైందని కంపెనీ తెలిపింది.
మొత్తంగా చూస్తే దేశీయ మార్కెట్లో ఎస్యూవీలకు పెరుగుతున్న ఆదరణ ఆటో రంగానికి ప్రధాన బలంగా మారింది. దీనికి తోడు ఎలక్ట్రిక్ వాహనాల అమ్మకాలు, ఎగుమతులు కూడా కంపెనీల వృద్ధికి ఊతమిస్తున్నాయి.