- బ్రాండెడ్ మందులతో సమానంగా పనిచేస్తాయి!
- స్పష్టం చేసిన డా. శివకుమార్ తేజావత్..
ఆరోగ్య అత్యవసర పరిస్థితుల్లో సామాన్యుడి జేబుకు చిల్లు పెట్టే ప్రధాన అంశం మందుల ఖర్చు. దేశవ్యాప్తంగా కేంద్ర ప్రభుత్వం ‘జన ఔషధి కేంద్రాల’ ద్వారా చౌకగా ఔషధాలను అందుబాటులోకి తెస్తున్నప్పటికీ, ప్రజల్లో ఇప్పటికీ ఒక సందేహం వెంటాడుతూనే ఉంది: “తక్కువ ధరకే వస్తున్నాయి కదా, ఇవి సరిగ్గా పనిచేస్తాయా? నాణ్యత ఉంటుందా?”
ఈ అపోహలపై ఇండియన్ ఫార్మసిస్ట్ అసోసియేషన్ రాష్ట్ర అధ్యక్షుడు, సీనియర్ ఫార్మసీ ఆఫీసర్ డాక్టర్ శివకుమార్ తేజావత్ స్పష్టతనిచ్చారు. జనరిక్ మందులపై ప్రజలు అపోహలను వీడాలని, అవి బ్రాండెడ్ మందులతో వంద శాతం సమానంగా పనిచేస్తాయని ఆయన స్పష్టం చేశారు.
ధరల్లోనే తేడా… పనితీరులో కాదు!
బ్రాండెడ్ మందులకు, జనరిక్ మందులకు మధ్య ఉన్న వ్యత్యాసాన్ని వివరిస్తూ, వాటి తయారీ విధానం వెనుక ఉన్న అసలు నిజాన్ని డాక్టర్ శివకుమార్ తేజావత్ వెల్లడించారు.
ఒకే ఫార్ములా – ఒకే నాణ్యత : బ్రాండెడ్, జనరిక్ మందులు రెండూ ఒకే రకమైన రసాయన ఫార్ములాలతో , ఒకే రకమైన నాణ్యతా ప్రమాణాలు కలిగిన కంపెనీలలోనే తయారవుతాయి. కాబట్టి వీటి సామర్థ్యంలో ఎలాంటి తేడా ఉండదు.
ధరల వ్యత్యాసం ఎందుకు? : పెద్ద ఫార్మా కంపెనీలు తాము తయారు చేసిన మందులకు ఆకర్షణీయమైన ప్యాకింగ్ చేయడం, విస్తృతమైన ప్రకటనలు , ప్రచారం కల్పించడం మరియు వైద్యులకు ప్రమోట్ చేయడం వల్ల వాటి ధరలు ఆకాశాన్నంటుతాయి. కానీ, జనరిక్ మందులకు ఇలాంటి అదనపు హంగులు, ప్రచార ఖర్చులు ఉండవు.
భారీగా తగ్గే వైద్య ఖర్చులు : ఒక ఉదాహరణ పరిశీలిస్తే, మార్కెట్లో ఒక బ్రాండెడ్ మందు ధర రూ. 3,000 వరకు ఉంటే, అదే ఫార్ములా కలిగిన జనరిక్ మందు కేవలం రూ. 700 నుండి రూ. 800 లకే లభిస్తుంది. అంటే దాదాపు 70 నుండి 80 శాతం వరకు రోగుల డబ్బు ఆదా అవుతుంది.
ఫార్మసిస్ట్ల పాత్ర కీలకం :
సాధారణ ప్రజలకు ఏది బ్రాండెడ్, ఏది జనరిక్ అనే విషయంపై పూర్తి అవగాహన ఉండకపోవచ్చు. ఇక్కడే ఔషధ నిపుణుల పాత్ర ఎంతో కీలకమని డాక్టర్ శివకుమార్ అభిప్రాయపడ్డారు. “మెడికల్ షాపుల్లో ఉండే రిజిస్టర్డ్ ఫార్మసిస్ట్లకు మాత్రమే బ్రాండెడ్, జనరిక్ మందుల మధ్య ఉన్న ఫార్ములాలు, వాటి ధరల వ్యత్యాసాలపై పూర్తి అవగాహన ఉంటుంది. కాబట్టి, ఫార్మసీలలో పనిచేసే ఔషధ నిపుణులు కేవలం వ్యాపార ధోరణిలోనే కాకుండా, సామాజిక బాధ్యతగా రోగులకు ఈ ధరల తేడాలను వివరించాలి. జనరిక్ మందులను వాడేలా వారిని ప్రోత్సహించాలి.”
భ్రమలు వీడుదాం.. ఆరోగ్యాన్ని కాపాడుకుందాం!
ఖరీదైన మందులే ప్రాణాలు కాపాడతాయనేది కేవలం భ్రమ మాత్రమే. రంగురంగుల ప్యాకింగ్లు, బ్రాండ్ పేర్లను చూసి మోసపోకుండా, అదే నాణ్యతతో తక్కువ ధరకే లభించే జనరిక్ మందులను ఆశ్రయించడం వల్ల పేద, మధ్యతరగతి కుటుంబాలపై ఆర్థిక భారం తప్పుతుంది. ప్రభుత్వం, ఫార్మసిస్ట్లు, ప్రజలు భాగస్వామ్యులైనప్పుడే ‘అందరికీ చౌకైన వైద్యం’ అనే సామాజిక లక్ష్యం నెరవేరుతుంది. కాబట్టి, జనరిక్ మందులపై నమ్మకం ఉంచుదాం.. ఆరోగ్యాన్ని, ఆర్థికాన్ని కాపాడుకుందాం..