- జూబ్లీహిల్స్ ప్రాంతంలో వెలుగు చూసిన ఘటన..
- పారిపోయిన కారులో ఉన్న వారు..
- అపార్ట్మెంట్ గేటును బలంగా ఢీకొట్టిన కారు..
హైదరాబాద్లోని సంపన్నులు నివసించే జూబ్లీహిల్స్ ప్రాంతంలో ఆదివారం తెల్లవారుజామున ఓ లగ్జరీ కారు బీభత్సం సృష్టించింది. వేగంగా దూసుకొచ్చిన ఫెరారీ కారు అదుపుతప్పి ఓ అపార్ట్మెంట్ గేటును బలంగా ఢీకొట్టింది. ఈ ఘటనలో ఎవరికీ గాయాలు కాలేదని, అయితే కారులో ఉన్నవారు దానిని అక్కడే వదిలేసి పరారయ్యారని అధికారులు తెలిపారు. ఫిలింనగర్ పోలీస్ స్టేషన్ పరిధిలోని జూబ్లీహిల్స్ రోడ్ నంబర్ 5లో ఈ ప్రమాదం చోటుచేసుకుంది. ఫోర్ట్ వ్యూ అపార్ట్మెంట్స్ గేటును కారు ఢీకొట్టడంతో అది పూర్తిగా ధ్వంసమైంది. సుమారు రూ. 3.50 కోట్లకు పైగా విలువ చేసే ఫెరారీ రోమా కారు ముందు భాగం కూడా నుజ్జునుజ్జయింది.
ప్రమాదం జరిగిన వెంటనే డ్రైవర్, అందులోని ఇతర వ్యక్తులు అక్కడి నుంచి పారిపోయారు. సమాచారం అందుకున్న పోలీసులు ఘటనా స్థలానికి చేరుకున్నారు. మద్యం మత్తులో అతివేగంగా, నిర్లక్ష్యంగా నడపడం వల్లే ఈ ప్రమాదం జరిగిందని ప్రాథమికంగా అనుమానిస్తున్నారు. కేసు నమోదు చేసుకుని దర్యాప్తు ప్రారంభించారు. కారులో ఎంతమంది ఉన్నారనేది తెలుసుకునేందుకు సమీపంలోని సీసీటీవీ ఫుటేజీని పరిశీలిస్తున్నారు. ధ్వంసమైన కారును టోయింగ్ వాహనం సహాయంతో పోలీస్ స్టేషన్కు తరలించారు.
కొన్ని రోజుల వ్యవధిలో జూబ్లీహిల్స్లో ఇలాంటి ఘటన జరగడం ఇది రెండోసారి కావడం గమనార్హం. జూలై 9న రాత్రి, రోడ్ నంబర్ 10లో ప్రముఖ నటుడు ధర్మ ఇంటి కాంపౌండ్ వాల్ను ఓ ఎస్యూవీ ఢీకొట్టింది. ఆ సమయంలో మద్యం మత్తులో ఉన్న కార్తీక్ కుమార్ అనే వ్యక్తిని పోలీసులు అరెస్ట్ చేశారు. ఇప్పుడు మరో ఘటన జరగడంతో ఈ ప్రాంతంలో వరుస ప్రమాదాలు కలకలం రేపుతున్నాయి.