- కడ్తాల్లో ఘనంగా లయన్స్ క్లబ్ ‘గురు వందన’..
ఉపాధ్యాయులు కేవలం పాఠ్యాంశాలను బోధించేవారు మాత్రమే కాదని, విద్యార్థుల్లో జ్ఞానం, క్రమశిక్షణ, విలువలు, ఆత్మవిశ్వాసాన్ని పెంపొందిస్తూ వారి భవిష్యత్తుకు దిశానిర్దేశం చేసే మార్గదర్శకులని పాస్ట్ మల్టీపుల్ చైర్పర్సన్, లయన్ ఎస్. నరేందర్ రెడ్డి అన్నారు. లయన్స్ క్లబ్ ఆఫ్ ఆమనగల్ ఆధ్వర్యంలో గురువారం కడ్తాల్లోని(Kadthal) పీఎంశ్రీ బాలుర ఉన్నత పాఠశాలలో నిర్వహించిన ‘గురు వందన’ కార్యక్రమానికి ఆయన ముఖ్య అతిథిగా హాజరయ్యారు.కల్వకుర్తి నియోజకవర్గ స్థాయిలో విద్యారంగంలో విశిష్ట సేవలు అందిస్తున్న 25 మంది ఉత్తమ ఉపాధ్యాయులకు ‘ఉత్తమ ఉపాధ్యాయ పురస్కారాలు–2026’(Best Teacher Awards) అందించి ఘనంగా సన్మానించారు.
ఒక గురువు.. తరతరాల భవిష్యత్తుకు శిల్పి
ఈ సందర్భంగా లయన్ ఎస్. నరేందర్ రెడ్డి మాట్లాడుతూ.. ఒక మంచి ఉపాధ్యాయుడు తన బోధనతో ఒక్క విద్యార్థినే కాకుండా,తరతరాల భవిష్యత్తును తీర్చిదిద్దగలరన్నారు.విద్యార్థులకు పుస్తక జ్ఞానంతో పాటు క్రమశిక్షణ,మానవీయ విలువలు,సమాజం పట్ల బాధ్యత,ఆత్మవిశ్వాసం వంటి లక్షణాలను అలవర్చడంలో ఉపాధ్యాయుల పాత్ర అత్యంత కీలకమన్నారు.“ఒక ఉపాధ్యాయుడు తన జీవితంలో తీర్చిదిద్దిన విద్యార్థుల విజయాల ద్వారా ఆయన పేరు ఎప్పటికీ నిలిచిపోతుంది” అని పేర్కొన్నారు.(epaper.aadabhyderabad.in)
మాదకద్రవ్యాలపై అప్రమత్తత అవసరం
ప్రస్తుత పరిస్థితుల్లో విద్యార్థులు డ్రగ్స్,మాదకద్రవ్యాలు,చెడు వ్యసనాలు,క్రమశిక్షణారాహిత్యానికి దూరంగా ఉండేలా తల్లిదండ్రులు,ఉపాధ్యాయులు ప్రత్యేక శ్రద్ధ వహించాలని నరేందర్ రెడ్డి సూచించారు.మాదకద్రవ్యాల వల్ల కలిగే అనర్థాలపై విద్యార్థులకు చిన్ననాటి నుంచే అవగాహన కల్పించాలని అన్నారు.విద్యార్థుల్లో మంచి నడవడి,క్రమశిక్షణ,నైతిక విలువలు,సమాజం పట్ల బాధ్యతను పెంపొందించే దిశగా ఉపాధ్యాయులు నిరంతరం కృషి చేయాలని పిలుపునిచ్చారు.
ఉపాధ్యాయుల సేవలకు అభినందనలు
గౌరవ అతిథులుగా పాల్గొన్న లయన్ పి.లక్ష్మారెడ్డి,రిటైర్డ్ డైరెక్టర్ ఆఫ్ స్కూల్ ఎడ్యుకేషన్,అలాగే రీజినల్ చైర్మన్ లయన్ ప్రశాంత్ రెడ్డి ఉత్తమ ఉపాధ్యాయులను అభినందించారు.విద్యార్థుల భవిష్యత్తును తీర్చిదిద్దడంలో ఉపాధ్యాయులు అందిస్తున్న సేవలను కొనియాడారు.కడ్తాల్,ఆమనగల్ మండల విద్యాధికారులు నిర్మల,పాండు కార్యక్రమంలో పాల్గొని ఉత్తమ ఉపాధ్యాయులను అభినందించారు.
ఘనంగా ఉపాధ్యాయుల సన్మానం
కార్యక్రమంలో భాగంగా ఎంపికైన 25 మంది ఉత్తమ ఉపాధ్యాయులకు శాలువాలు కప్పి,ప్రశంసా పత్రాలు అందజేసి ఘనంగా సత్కరించారు.విద్యారంగంలో వారు చేసిన సేవలను గుర్తిస్తూ అభినందనలు తెలిపారు.కార్యక్రమ చైర్మన్ లయన్ జంగయ్య,కో-చైర్మన్ లయన్ కె. గోవర్ధన్ రెడ్డి,కార్యదర్శి లయన్ గంగుల శ్రీనివాస్ రెడ్డి,కోశాధికారి లయన్ గంప శ్రీనివాస్ ఆధ్వర్యంలో కార్యక్రమం విజయవంతంగా నిర్వహించారు.
ఈ కార్యక్రమంలో విద్యా శాఖ మాజీ జేడీ పసుల లక్ష్మా రెడ్డి,రీజినల్ చైర్మన్ ప్రశాంత్ రెడ్డి,లయన్స్ క్లబ్ సభ్యులు జూలూరి లింగయ్య,బండెల రామచంద్ర రెడ్డి,జూలూరి రమేష్,గుజ్జరి నర్సింహ,పాపిశెట్టి రాము,కొండల్ రెడ్డి,వేణు పంతులు,జహంగీర్ అలీ,పిప్పళ్ల వెంకటేష్,జల్కం రమేష్ తదితర లయన్స్ క్లబ్ సభ్యులు పాల్గొన్నారు.“గురువులను గౌరవించడం అంటే భవిష్యత్తును గౌరవించడం” అనే సందేశంతో నిర్వహించిన ఈ గురు వందన కార్యక్రమం ఉపాధ్యాయులు,లయన్స్ క్లబ్ సభ్యులు,సభికుల ప్రశంసలు అందుకుంది.