- అయితే మీరు చదవాల్సిందే..
ప్రస్తుతకాలంలో మనలో చాలా మందిని వేధిస్తున్న అనారోగ్య సమస్యల్లో థైరాయిడ్ ఒకటి. ప్రతి పది మందిలో ఒకరు హైపోథైరాయిడిజంతో బాధపడుతున్నారు. ముఖ్యంగా మహిళలు ఈ సమస్యతో ఎక్కువగా ఇబ్బందిపడుతున్నారు. థైరాయిడ్ సమస్యను నియంత్రణలో ఉంచుకోవడానికి రోజూ కొన్ని లక్షల మంది థైరాయిడ్ ట్యాబ్లెట్లను వేసుకుంటున్నారని చెప్పవచ్చు.
అయితే మనలో చాలా మంది థైరాయిడ్ ట్యాబ్లెట్లను వేసుకుంటున్నప్పటికీ దాని ఫలితాలు సరిగ్గా లేవని, ట్యాబ్లెట్లను వేసుకున్నప్పటికీ బరువు పెరగడం, అలసట, శక్తి లేకపోవడం, జుట్టు రాలడం, పొడి చర్మం వంటి సమస్యలతో బాధపడుతూనే ఉన్నామని చెబుతుంటారు. ట్యాబ్లెట్లను వేసుకున్నప్పటికీ సమస్యలతో ఎందుకు బాధపడుతున్నారు..
మన శరీరంలో ముఖ్యమైన గ్రంథుల్లో థైరాయిడ్ ఒకటి. గొంతు కింద భాగంలో సీతాకోకచిలుక ఆకారంలో ఈ గ్రంథి ఉంటుంది. శరీరంలో శక్తి ఉత్పత్తి, వినియోగం, నిల్వలను నియంత్రించే కీలక విధులను ఈ గ్రంథి నిర్వర్తిస్తుంది. మెదడులోని పిట్యూటరీ గ్రంథి థైరాయిడ్ గ్రంథి కార్యకలపాలను నియంత్రిస్తుంది. థైరాయిడ్ గ్రంథి థైరాక్సిన్ టి-4, ట్రైయోడోథైరొనిన్ టి-3 కణ స్థాయిలో పనిచేసే క్రియాశీల హార్మోన్)ను ఉత్పత్తి చేస్తుంది.
ఇక థైరాయిడ్ హార్మోన్లు ఎక్కువగా ఉత్పత్తి అవ్వడం వల్ల హైపర్ థైరాయిడిజం వస్తుంది. గ్రేవ్స్ వ్యాధి కారణంగా ఎక్కువగా ఈ సమస్య వస్తుంది. ఆందోళన, వేడిని తట్టుకోలేకపోవడం, బరువు తగ్గడం, గుండెదడ వంటి లక్షణాలు ఈ సమస్యలో కనిపిస్తాయి. సరైన మందులు ఉన్నప్పటికీ చాలా మందిలో అలసట, బరువు నియంత్రణలో లేకపోవడం, మానసిక సమస్యలు ఎక్కువగా కనిపిస్తుంటాయి.
థైరాయిడ్ హార్మోన్లు సరిగ్గా ఉన్నా కణాల శక్తి బలహీనంగా ఉంటే జీవక్రియ సరిగ్గా జరగదు. కనుక మందులు వాడినప్పటికీ సమస్యలు తగ్గవని నిపుణులు చెబుతున్నారు. థైరాయిడ్ సమస్యను హార్మోన్ల సమస్యగా కాకుండా కణశక్తి సమస్యగా చూడాలని వారు చెబుతునన్నారు. కణశక్తి స్థాయినిపెంచడానికి ప్రోటీన్ ఎక్కువగా ఉండే ఆహారాలను తీసుకోవాలి. ఐరన్, విటమిన్ బి, మెగ్నీషియం లోపాలు లేకుండా చూసుకోవాలి.
నిద్రలేమి, ఒత్తిడి వంటి సమస్యలు రాకుండా చూసుకోవాలి. కండర వ్యాయామాలు చేయాలి. ప్రాసెస్ చేసిన ఆహారాలను తీసుకోవడం తగ్గించాలి. ట్యాబ్లెట్లను తీసుకోవడంతో పాటు జీవనశైలిలో మార్పులు చేసుకోవడం వల్ల థైరాయిడ్ వల్ల వచ్చే ఇతర అనారోగ్య సమస్యలు కూడా తగ్గుతాయని వైద్యులు తెలియజేస్తున్నారు.