- డొనాల్ట్ ట్రంప్ కి షొక్..(Donald Trump)
- విజయతోరణం వ్యవహారం కోర్టుకు..
అమెరికా రాజధాని వాషింగ్టన్‌లో అధ్యక్షుడు డొనాల్డ్ ట్రంప్(Donald Trump) నిర్మించ తలపెట్టిన ‘విజయ తోరణం’ వివాదానికి దారితీసింది. ఈ నిర్మాణం మాజీ అధ్యక్షుడు జాన్ ఎఫ్ కెన్నెడీ సమాధి వీక్షణకు అడ్డుగా ఉంటుందని ఆరోపిస్తూ, ఆయన కుటుంబ సభ్యులు కోర్టును ఆశ్రయించారు. ఈ ప్రాజెక్టును నిలిపివేయాలని కోరుతూ వారు దావా వేశారు. దీంతో ఈ ప్రతిష్ఠాత్మక నిర్మాణంపై నీలినీడలు కమ్ముకున్నాయి.
వర్జీనియాలోని ఆర్లింగ్టన్ జాతీయ స్మశానవాటికకు ముఖద్వారం వద్ద 250 అడుగుల ఎత్తుతో ఈ ఆర్చ్‌ను నిర్మించాలని ట్రంప్ ప్రభుత్వం ప్లాన్ చేసింది. అయితే, ఈ నిర్మాణం వల్ల జాన్ ఎఫ్ కెన్నెడీ సమాధితో పాటు అక్కడ ఖననం చేసిన వేలాది మంది సైనిక వీరుల సమాధులను చూసేందుకు శాశ్వతంగా అడ్డంకి ఏర్పడుతుందని కెన్నెడీ కుటుంబంలోని తొమ్మిది మంది సభ్యులు తమ పిటిషన్‌లో ఆందోళన వ్యక్తం చేశారు. గత వారం ఈ ప్రాజెక్టుకు నేషనల్ క్యాపిటల్ ప్లానింగ్ కమిషన్ ఆమోదం తెలిపినప్పటికీ, అమెరికా జిల్లా జడ్జి తాన్యా చుట్కన్ 14 రోజుల పాటు నిర్మాణ పనులపై తాత్కాలిక స్టే విధించారు.
కెన్నెడీ కుటుంబ సభ్యులు తమ ఫిర్యాదులో, ఈ నిర్మాణం వల్ల చారిత్రక ప్రాధాన్యమున్న వీక్షణ రేఖలకు తీవ్ర నష్టం వాటిల్లుతుందని పేర్కొన్నారు. ఆర్లింగ్టన్ శ్మశానవాటికను సందర్శించే అనుభూతిని ఈ ఆర్చ్ పూర్తిగా మార్చివేస్తుందని, సమాధులకు ఇది ‘శాశ్వత అవమానం’ అని వారు ఆవేదన వ్యక్తం చేశారు. రాబర్ట్, ఎథెల్ కెన్నెడీల ఏడుగురు పిల్లలతో పాటు వారి మనవడు, మాజీ కాంగ్రెస్ సభ్యుడు జో కెన్నెడీ, టెడ్ కెన్నెడీ కుమారుడు ఎడ్వర్డ్ కెన్నెడీ జూనియర్ ఈ దావా వేసిన వారిలో ఉన్నారు. అయితే, ట్రంప్ క్యాబినెట్‌లో ఆరోగ్య శాఖ మంత్రిగా ఉన్న రాబర్ట్ ఎఫ్ కెన్నెడీ జూనియర్ ఇందులో భాగస్వామి కాలేదు.
ఈ వివాదంపై వైట్‌హౌస్ స్పందించింది. “ఆర్లింగ్టన్ శ్మశానవాటికలో విశ్రాంతి తీసుకుంటున్న మన వీరులను గౌరవించేందుకు ఉద్దేశించిన నిర్మాణానికి వ్యతిరేకంగా కెన్నెడీ కుటుంబ సభ్యులు దావా వేయడం దురదృష్టకరం” అని వైట్‌హౌస్ ప్రతినిధి డేవిస్ ఆర్ ఇంగిల్ ‘బీబీసీ’కి ఇచ్చిన ఒక ప్రకటనలో తెలిపారు. దేశాన్ని ఏకం చేసే ఈ కట్టడాన్ని రాజకీయం చేసేందుకు న్యాయవ్యవస్థను దుర్వినియోగం చేయకూడదని ఆయన హితవు పలికారు. ఈ కేసులో తమకే విజయం లభిస్తుందని ధీమా వ్యక్తం చేశారు.(https://epaper.aadabhyderabad.in/)(Youtube)