ఉమ్మడి శిక్షణా శిబిరాలు, ఫ్రెండ్లీ మ్యాచ్ లపై దృష్టి సారించాలని సూచన
ఇండియాలో క్రికెట్ అకాడమీ ఏర్పాటుచేయాలని భావిస్తున్నట్లు వెల్లడి
ఆస్ట్రేలియా(మెల్బోర్న్): ఏపీలో ప్రతిభగల క్రికెట్ క్రీడాకారులను గుర్తించడానికి ఆంధ్రా క్రికెట్ అసోసియేషన్(ACA) ఆధ్వర్యంలో ఆంధ్ర ప్రీమియర్ లీగ్(APL)ను నిర్వహిస్తున్నామని విద్య, ఐటీ, ఎలక్ట్రానిక్స్ శాఖల మంత్రి నారా లోకేష్ (Nara Lokesh) చెప్పారు. మెల్బోర్న్ క్రికెట్ గ్రౌండ్(Melbourne Cricket Ground)లో క్రికెట్ విక్టోరియా (Cricket Victoria) ఎగ్జిక్యూటివ్‌లతో సమావేశమయ్యారు.
ఈ సందర్భంగా ఆయన చెప్పిన విషయాలు.. ఏపీ క్రీడాకారులను IPL స్థాయికి తీసుకెళ్లడమే ఏపీఎల్ ముఖ్యోద్ధేశం. IPL 2025 మెగా వేలంలో APL నుంచి షేక్ రషీద్, త్రిపూర్ణ విజయ్, నితీష్ రెడ్డి, సత్యనారాయణరాజు, పైలా అవినాష్ ఎంపికయ్యారు. వీరితోపాటు గతంలో APLలో ఆడిన ఇతర ఆటగాళ్లనూ వివిధ IPL జట్లు చేర్చుకున్నాయి. ఆంధ్రప్రదేశ్/విక్టోరియాల్లో క్రికెట్ క్రీడాకారుల నైపుణ్యాన్ని పెంచేందుకు ఉమ్మడి శిక్షణా శిబిరాలు, స్నేహపూర్వక మ్యాచ్‌లు నిర్వహించే అంశాన్ని పరిశీలించాల్సిందిగా విజ్ఞప్తి. క్రికెట్ సౌకర్యాలు, ఈవెంట్ల నిర్వహణలో పర్యావరణ అనుకూల పద్ధతులను ప్రోత్సహించాలి. మహిళా క్రికెట్ క్రీడాకారులకు అవకాశాలను విస్తరించే కార్యక్రమాలపై దృష్టిసారించాలి. లైవ్ స్ట్రీమింగ్, సోషల్ మీడియా(Social Media), డిజిటల్ ప్లాట్‌ఫామ్‌ల ద్వారా అభిమానుల అనుభవాన్ని మెరుగుపర్చేందుకు చొరవచూపాలి.
క్రికెట్ విక్టోరియా ప్రతినిధులు మాట్లాడుతూ.. ఇండియాలో జారీచేసే క్రికెట్ విద్య డిప్లొమాలు, డిగ్రీలపై ఆసక్తిగా ఉన్నట్లు చెప్పారు. ఇంకా ఏమన్నారంటే.. ఇండియాలో క్రికెట్ అకాడమీని ఏర్పాటుచేయాలని భావిస్తున్నాం. మహిళల క్రికెట్ అభివృద్ధికి మా వంతు సహకారం అందిస్తాం. విక్టోరియా రాష్ట్రంలో వివిధ స్థాయిల్లో క్రికెట్ క్రీడాకారులను ప్రోత్సహించడం, క్రీడా సౌకర్యాలను అభివృద్ధి చేయడం మా లక్ష్యం. విక్టోరియా పురుషుల జట్టు (విక్టోరియా బుష్‌రేంజర్స్), విక్టోరియన్ మహిళల జట్టు(విక్టోరియా స్పిరిట్) సహా విక్టోరియా ప్రొఫెషనల్ క్రికెట్ జట్లను క్రికెట్ విక్టోరియా పర్యవేక్షిస్తోంది. రాష్ట్రవ్యాప్తంగా ఔత్సాహిక క్రికెటర్ల ప్రోత్సానికి జూనియర్ క్రికెట్, స్కూల్ ఈవెంట్స్, కమ్యూనిటీ క్లబ్‌లకు మద్దతిస్తున్నాం. అంతర్జాతీయంగా పేరొందిన మెల్బోర్న్ క్రికెట్ గ్రౌండ్ సహా రాష్ట్రవ్యాప్తంగా క్రికెట్ సౌకర్యాలను అభివృద్ధి చేస్తున్నాం. విక్టోరియా బుష్‌రేంజర్స్ షెఫీల్డ్ షీల్డ్(ఫస్ట్-క్లాస్ క్రికెట్), మార్ష్ వన్-డే కప్(దేశీయ వన్డే పోటీ)లో పోటీపడుతుండగా విక్టోరియా స్పిరిట్ మహిళల జట్టు జాతీయ క్రికెట్ లీగ్(WNCL), మహిళల బిగ్ బాష్ లీగ్(WBBL)ల్లో తలపడుతున్నారు.