- ప్రభుత్వ ఖజానాకి కన్నం వేస్తున్న విద్యుత్ అధికారులు..
- జీహెచఎంసీ అనుమతులు లేకుండానే హెచ్వీ కనెక్షన్..
- కేటగిరీ-8కు బదులు కేటగిరీ-2 కింద సేవ కేటాయింపు..
- విద్యుత్ శాఖ అధికారుల పాత్రపై విచారణకు డిమాండ్..
- బాధ్యులపై శాఖాపరమైన చర్యలు తీసుకోవాలని విజ్ఞప్తి..
రంగారెడ్డి జిల్లా, శంషాబాద్ మండలం పరిధిలోని హెచ్.నెం. 15-14లో ఉన్న భవనానికి తెలంగాణ రాష్ట్ర దక్షిణ ప్రాంత విద్యుత్ పంపిణీ సంస్థ (టీజీఎస్పీడీసీఎల్) నిబంధనలను ఉల్లంఘించి విద్యుత్ కనెక్షన్ మంజూరు చేసినట్లు వెలువడిన ఆరోపణలు తీవ్ర కలకలం రేపుతున్నాయి. జీహెచఎంసి లేదా మున్సిపాలిటీ నుండి ఎలాంటి అనుమతులు లేకపోయినా, స్వార్థ ప్రయోజనాల కోసం అధికారులు పాఠశాల యాజమాన్యంతో లోపాయకారి ఒప్పందం కుదుర్చుకుని ఈ అక్రమాలకు పాల్పడినట్లు స్పష్టమవుతోంది. “కావలి ఉండే వాడే కన్నం వేస్తే, దేవుడే దిగివచ్చినా కాపాడలేడు” అన్నట్లుగా.. ప్రజలకు సేవ చేయాల్సిన అధికారులే ప్రభుత్వ ఆస్తులకు రక్షణగా నిలవాల్సింది పోయి, ఖజానాకి కన్నం వేస్తుండడం శంషాబాద్ విద్యుత్ శాఖలో చర్చనీయాంశమైంది.
శంషాబాద్ విద్యుత్ శాఖ కార్యాలయంలో పనిచేస్తున్న సహాయ ఇంజనీరు (ఏఈ), సహాయ సంచాలక ఇంజనీరు (ఏడీఈ), మరియు సంచాలక ఇంజనీరు (డీఈ) స్థాయి అధికారులు తమ వ్యక్తిగత స్వార్థం కొరకు ప్రభుత్వానికి భారీగా ఆర్థికంగా నష్టం చేకూరుస్తున్నారు. “ఇంట్లో ఈగలు తోలుతూ.. బజార్లో పిల్లులను పట్టుకున్నట్లు” కింది స్థాయి నిబంధనలను తుంగలో తొక్కి, అక్రమార్కులకు మాత్రం ఎర్ర తివాచీ పరుస్తున్నారు.
ప్రధాన వివరాలు:
- భవన చిరునామా: హెచ్.నెం. 15-14, శంషాబాద్ గ్రామం మరియు మండలం, రంగారెడ్డి జిల్లా.
- సేవా సంఖ్య: 350124363
- మంజూరు తేదీ: 17-02-2025
- విద్యుత్ రకం: హై వోల్టేజ్ (అధిక పీడన) విద్యుత్ సేవా కనెక్షన్
- భార వివరాలు: 40.00 కిలోవాట్ల ఒప్పంద భారం మరియు 40.00 కిలోవాట్ల అనుసంధాన భారం మంజూరు చేయబడింది.
- కేటగిరీ: విద్యుత్ శాఖ రికార్డుల ప్రకారం ఈ సేవ కేటగిరీ/ఉప కేటగిరీ: 2/0 (క్రమబద్ధమైన సేవ) కింద కేటాయించబడింది.
నిబంధనల ఉల్లంఘన మరియు చార్జీల వ్యత్యాసం : జీహెచఎంసి నుండి గానీ, మున్సిపాలిటీ నుండి గానీ ఎలాంటి అనుమతులు లేకుండా అక్రమ నిర్మాణం చేపట్టినప్పటికీ, విద్యుత్ శాఖ మార్గదర్శకాల ప్రకారం కేటగిరీ 8 (తాత్కాలిక సరఫరా) కింద విద్యుత్ సరఫరా ఇవ్వాల్సి ఉంటుంది.
కానీ, విద్యుత్ శాఖ అధికారులు స్వార్థ ప్రయోజనాల కోసం యాజమాన్యంతో లోపాయకారి ఒప్పందం కుదుర్చుకుని కేటగిరీ 2 కింద విద్యుత్ కనెక్షన్ మంజూరు చేశారు. “అధికారం చేతిలో ఉంది కదా అని ఇష్టానుసారంగా వ్యవహరిస్తే.. కుండ బద్దలయ్యే రోజు ఎంతో దూరంలో లేదు” అనే విషయాన్ని అధికారులు విస్మరిస్తున్నారు.
కేటగిరీ 2 చార్జీల వివరాలు
- 0 నుండి 50 కిలోవాట్లు: స్థిర చార్జ్ రూ. 60 / నెల, శక్తి చార్జ్ యూనిట్ కు రూ. 5.30
- 51 నుండి 100 కిలోవాట్లు: స్థిర చార్జ్ రూ. 60 / నెల, శక్తి చార్జ్ యూనిట్ కు రూ. 6.60
- 101 నుండి 200 కిలోవాట్లు: స్థిర చార్జ్ రూ. 60 / నెల, శక్తి చార్జ్ యూనిట్ కు రూ. 7.50
- కేటగిరీ 8 (తాత్కాలిక సరఫరా) చార్జీల వివరాలు:
- స్థిర చార్జ్: రూ. 21 / నెల (ప్రతి కిలోవాట్ కు)
- శక్తి చార్జ్ (యూనిట్ రేటు): రూ. 12.00 (ప్రతి కిలో వాట్ అవర్ లేదా కిలో వోల్ట్ ఆంపియర్ అవర్ కు)
ఇక్కడ గమనించవలసిన విషయం ఏంటంటే 10 కిలోవాట్లు మరియు అంతకంటే ఎక్కువ భారం ఉన్న అన్ని సేవలకు ట్రివెక్టర్ మీటర్లు అందించబడతాయి మరియు కిలో వోల్ట్ ఆంపియర్ అవర్ ప్రాతిపదికన శక్తి చార్జీలు బిల్లు చేయబడతాయి. అనధికార నిర్మాణానికి కేటగిరీ 2 కింద శాశ్వత కనెక్షన్ ఇవ్వడం ద్వారా భారీ ఎత్తున విద్యుత్ చార్జీల వ్యత్యాసంతో ప్రభుత్వ ఆదాయానికి గండి కొట్టడమే కాకుండా, అనధికార నిర్మాణానికి పరోక్షంగా చట్టబద్ధత కల్పించినట్లయింది.
“దొంగిలించింది గోరంత అయితే, దొరికింది కొండంత” అన్న చందంగా అధికారులు చేసిన అక్రమాలు ఇప్పుడు వెలుగులోకి వచ్చాయి. ఈ వ్యవహారంపై సమగ్ర విచారణ జరిపి, బాధ్యులైన అధికారులపై తగిన శాఖాపరమైన మరియు చట్టపరమైన చర్యలు తీసుకోవాలని తీవ్ర డిమాండ్ వ్యక్తమవుతోంది. మచ్చుకు ఇది ఒక చిన్న ఉదాహరణ మాత్రమే. శంషాబాద్ విద్యుత్ శాఖ కార్యాలయంలో జరుగుతున్న అవినీతి రాజ్యంపై మరిన్ని పూర్తి ఆధారాలతో మరో కథనం త్వరలో వెలుగులోకి తేనుంది…?