- దాదాపు 60 గజాల జిహెచ్ఎంసి భూమి కబ్జా చేసిన అక్రమార్కులు
- స్థలం విలువ సుమారు రూ.30 లక్షలు
- జీహెచ్‌ఎంసీ సూచించే బోర్డు ఉన్న‌ప్ప‌టికి క‌బ్బా
- అధికారుల దృష్టికి వచ్చినా చర్యలు శూన్యం
- మాముళ్ల‌మ‌త్తులో జోగుతున్నసంబంధిత అధికారులు
- ప్రభుత్వ ఆస్తులను కాపాడాలని ప్రజలు డిమాండ్
నాచారం గ్రామంలోని ఒక ప్రభుత్వ స్థలం భూకబ్జాకు గురైంది. దాదాపు రూ.30 లక్షల విలువైన ఈ 60 గజాల స్థలాన్ని అక్రమార్కులు ఆక్రమించినా, అధికారులు చర్యలు తీసుకోవడం లేదని స్థానికులు ఆరోపిస్తున్నారు. గతంలో ఈ స్థలంలో ప్రజల కోసం ఒక పబ్లిక్ టాయిలెట్ నిర్మించారు. కాలక్రమేణా దాన్ని ఉపయోగించడం మానేయడంతో, జీహెచ్‌ఎంసీ అధికారులు ఆ స్థలం తమదని సూచిస్తూ బోర్డును కూడా పెట్టారు. అయితే, బోర్డు ఉన్నప్పటికీ అక్రమార్కులు ఆ స్థలంపై కన్నేసి, నిర్మాణాలకు పాల్పడుతున్నారని సమాచారం. ఈ కబ్జాపై స్థానిక నాయకులు, అధికారులు ఎవరూ స్పందించడం లేదని స్థానికులు ఆగ్రహం వ్యక్తం చేస్తున్నారు. అధికారుల నిర్లక్ష్యం వెనుక రాజకీయ నాయకుల అండదండలు ఉన్నాయా, లేదా అధికారులకు పెద్ద మొత్తంలో ముడుపులు అందాయా అనే అనుమానాలు వ్యక్తమవుతున్నాయి.
ప్రశ్నార్థకమైన అధికారుల తీరు
ప్రభుత్వ భూముల కబ్జాపై ఉన్నతాధికారులు ఎన్ని హెచ్చరికలు చేస్తున్నా, క్షేత్రస్థాయిలో మార్పు కనిపించడం లేదని ఆరోపణలు వెల్లువెత్తుతున్నాయి. నాచారం ఘటన ఇందుకు తాజా ఉదాహరణగా నిలుస్తోంది. ఇప్పటికే పలు పత్రికల్లో దీనిపై కథనాలు వచ్చినా, అధికారులు స్పందించకపోవడంపై విమర్శలు పెరుగుతున్నాయి. కేవలం సూచిక బోర్డులు పెట్టి చేతులు దులుపుకోవడం కాకుండా, ప్రహరీ గోడలు నిర్మించి ప్రభుత్వ ఆస్తులను కాపాడాల్సిన బాధ్యత అధికారులపై ఉందని స్థానికులు అంటున్నారు.
ప్రభుత్వ ఆస్తుల పరిరక్షణలో అధికారులు నిర్లక్ష్యం వహిస్తే, ఇలాంటి కబ్జాలు కొనసాగుతాయని, దీనిపై ఉన్నతాధికారులు తక్షణమే దృష్టి సారించి, బాధ్యులపై చర్యలు తీసుకోవాలని ప్రజలు డిమాండ్ చేస్తున్నారు. అలాగే, కబ్జాకు గురైన 60 గజాల స్థలాన్ని తిరిగి స్వాధీనం చేసుకోవాలని కోరుతున్నారు. కాప్రా సర్కిల్‌లో ఇలాంటి భూ కబ్జాలు పెరిగిపోతున్నాయని, అధికారులు వెంటనే అప్రమత్తం కావాలని స్థానికులు కోరుతున్నారు.