- రంగారెడ్డి జిల్లా, గండిపేట మండలంలో యధేచ్చగా భూ కబ్జా
- ప్రభుత్వ భూమి అన్యాక్రాంతం కావ‌డానికి స‌హ‌క‌రిస్తున్న తహసీల్దార్
- అధికారుల మౌనం.. కోకాపేటలో కోట్ల భూమికి గండి
- సర్కార్ భూమి అనే సూచిక బోర్డును ఆనుకొని అక్ర‌మనిర్మాణాలు
- సర్వే నెంబర్‌ 147లో కొంత ప్రభుత్వ భూమి మాయం
- సర్వే నెంబర్‌ 100, 109లో కూడా కబ్జాకు పాల్పడ్డ అక్రమార్కులు
- సర్కార్ భూమిలో ప్రైవేట్ సూపర్ స్పెషాలిటీ హాస్పిటల్‌ నిర్మాణం…
- అనుమతులు ఇచ్చిన నార్సింగి మున్సిపల్ కమిషనర్..
- ప్రేక్షక పాత్రలో రెవెన్యూ, మున్సిపల్ శాఖ అధికారులు..
- మాముళ్ల మత్తులో జోగుతూ కబ్జాకోరులకు సపోర్ట్‌ చేస్తున్న ఆఫీసర్స్‌
”పట్నంల పాము కరిస్తే పల్లెలో మంత్రాలు” అన్నట్లు ఉంది కోకాపేట ప్రభుత్వ భూముల వ్యవహారం. గండిపేట మండలం కోకాపేటలోని కోట్ల విలువైన ప్రభుత్వ భూమి కబ్జా అవుతున్నా ఉన్నతాధికారులు కళ్ళు మూసుకుని కూర్చున్నారని “ఆదాబ్ హైదరాబాద్” మరోసారి గుర్తుచేస్తోంది. గతంలో గండిపేట్‌ సర్కారీ భూములకు గండి… అనే శీర్షిక‌తో ప్రచురించిన కథనానికి స్పందించకపోవడం చూస్తే “అప్పుల బాధ పెట్టినోడు కుంపట్ల కెళ్ళి తప్పించుకున్నట్లు” ఉంది వీరి తీరు. రంగారెడ్డి జిల్లాలోని కోకాపేటలో జరుగుతున్న అక్రమాలపై రెవెన్యూ, మున్సిపల్ శాఖ అధికారులు ప్రేక్షకపాత్ర పోషిస్తున్నారని ఆరోపణలు వెల్లువెత్తుతున్నాయి. “మామూళ్ల మత్తులో జోగుతూ, కన్ను తెరిచి కాలు కడిగితే కప్పెంత పోతది?” అన్నట్లు కబ్జాదారులకు పూర్తిగా సహకరిస్తున్నారని స్పష్టమవుతోంది.
కోట్ల విలువైన భూమికి గండి
కోకాపేటలోని సర్వే నంబర్ 147, 100, 109లలోని ప్రభుత్వ భూమిలో కొంత భాగం అక్రమార్కులకు కాసులు కురిపిస్తోంది. ఈ భూమిలో సూపర్ స్పెషాలిటీ హాస్పిటల్స్, బహుళ అంతస్తులు, షాపింగ్ మాల్స్, హోటల్స్ వంటి పెద్ద పెద్ద నిర్మాణాలు జరుగుతున్నాయి. కొన్ని నిర్మాణాలు పూర్తై, భూఆక్ర‌మ‌ణ‌దారులు అట్టి నిర్మాణాల‌ను లీజ్‌కు ఇచ్చి కోట్ల రూపాయ‌లు గ‌డిస్తున్నారు.. “ఎద్దు ఎప్పుడు చచ్చినా దాని పొట్ట నిండదు” అన్నట్లుగా ఉంది ఈ అక్రమార్కుల తీరు. ఈ నిర్మాణాలకు నార్సింగి గ‌త మున్సిపల్ కమిషనర్ అనుమతులు ఇవ్వడం వెనుక భారీ ముడుపుల వ్యవహారం ఉందని స్థానిక ప్రజలు ఆరోపిస్తున్నారు.
అధికారుల బాధ్యతారాహిత్యం
ప్రభుత్వ భూమిని కాపాడాల్సిన తహసీల్దార్ శ్రీనివాస్ రెడ్డిని సంప్రదించగా, “తాగేటోడు లంగ, తేవోటోడు దొంగ” అన్నట్లుగా ఆయన వద్ద రికార్డులు లేవని, హెచ్‌ఎండీఏను అడగాలని పొంతన లేని సమాధానం చెప్పారు. ఇది తీవ్ర అనుమానాలకు దారితీస్తోంది. ప్రభుత్వ అధికారులు కబ్జాకోరులకు అండగా నిలుస్తూ, భారీగా లంచాలు తీసుకుని రికార్డులను సైతం మార్చేస్తున్నారని ఆరోపణలు వినిపిస్తున్నాయి. “పని చేసేటప్పుడు పులి, పని అయ్యాక గొర్రె” అన్నట్లుగా ఈ అక్రమాలకు అధికారులు ఎలా సహకరిస్తున్నారోన‌ని ప్రజలు ఆవేదన వ్యక్తం చేస్తున్నారు.
ప్రభుత్వానికి భారీగా ఆదాయ నష్టం
సర్వే నంబర్ 100, 109, 147లలో మిగిలిన ప్రభుత్వ భూమిని వేలం వేస్తే ప్రభుత్వానికి కోట్ల రూపాయల ఆదాయం వస్తుంది. కోకాపేటలో ఎక‌రం సుమారు రూ. వంద‌కోట్ల‌కు పైగా ప్రభుత్వం అమ్మ‌కాలు జ‌రిపింది.. అంత విలువైన భూమి అన్యాక్రాంతం అవుతుంటే.. ర‌క్షించాల్సిన అధికారులే భ‌క్షిస్తున్న అక్రమార్కులకు వ‌త్తాసు ప‌ల‌క‌డం అత్యంత బాధాకరం. అధికారులు తమ స్వార్థ ప్రయోజనాల కోసం కబ్జాదారులతో చేతులు కలిపి ప్రభుత్వానికి భారీ ఆదాయ నష్టం కలిగిస్తున్నారు. “దున్నపోతుపై వాన కురిసినట్లు” వీరి మౌనం ఉంది. ప్రభుత్వ భూమిని స్వాధీనం చేసుకుని, అక్రమాలకు పాల్పడిన వారిపై కఠిన చర్యలు తీసుకోవాలని, ముడుపులు తీసుకున్న అధికారులపై ఏసీబీ సమగ్ర దర్యాప్తు చేయాలని ప్రజలు డిమాండ్ చేస్తున్నారు. “ఎర్ర బుక్కు పడితే ఎవరైనా లొంగుతారు” అన్నట్లుగా ఏసీబీ చర్యలు తీసుకుంటే తప్ప ఈ అక్రమాలు ఆగవని ప్రజలు అంటున్నారు. ఈ అంశంపై ఉన్నతాధికారులు తక్షణమే స్పందించి, భూ కబ్జాదారులపై కఠిన చర్యలు తీసుకోవాలని స్థానిక ప్రజలు కోరుతున్నారు.