- కమిషనర్ సృజన
మేడ్చల్ సర్కిల్ పరిధిలో పౌర సౌకర్యాలను మెరుగుపరచడమే లక్ష్యంగా సైబరాబాద్ మున్సిపల్ కార్పొరేషన్ (CMC) కమిషనర్ సృజన శుక్రవారం క్షేత్రస్థాయిలో విస్తృతంగా పర్యటించారు. ఈ పర్యటనలో భాగంగా మేడ్చల్ సర్కిల్ డిప్యూటీ కమిషనర్ సుధాంశ్, ఇతర విభాగాల అధికారులతో కలిసి మౌలిక సదుపాయాలు, భూగర్భ, మురుగునీటి వ్యవస్థ (UGD) మరియు చెరువుల నిర్వహణపై కీలక సమీక్ష నిర్వహించారు. పనుల అమలులో నిర్లక్ష్యం వహించే అధికారులపై కఠిన చర్యలు ఉంటాయని ఈ సందర్భంగా ఆమె హెచ్చరించారు. చెరువుల ఉనికిని కాపాడటమే ప్రధాన లక్ష్యమని కమిషనర్ పేర్కొన్నారు.
టెండర్ ప్రక్రియ పూర్తయిన వెంటనే ఏజెన్సీలు రంగంలోకి దిగి అన్ని జలవనరుల నుండి గుర్రపుడెక్కను తక్షణమే తొలగించాలని ఆదేశించారు. ఇందుకోసం అవసరమైన సిబ్బందిని, యంత్రాలను వినియోగించాలని, గుర్రపుడెక్క మళ్ళీ పెరగకుండా నిరంతర పర్యవేక్షణ ఉండాలని స్పష్టం చేశారు. మురుగునీటి వ్యవస్థ లో ఎక్కడా అడ్డంకులు లేదా లీకేజీలు లేకుండా పక్కాగా పనిచేసేలా చూడాలని అధికారులను ఆదేశించారు. డ్రైనేజీ లైన్ల పూడికతీత పనులను నిర్ణీత గడువులోగా పూర్తి చేయాలని, డ్రైనేజీ ఓవర్ ఫ్లోపై వచ్చే ఫిర్యాదులను ప్రాధాన్యత క్రమంలో పరిష్కరించాలని సూచించారు.
మేడ్చల్ హైవే నుండి అయోధ్య ఎక్స్ రోడ్స్ కలిపే ప్రధాన రహదారిపై ఉన్న గుంతలను వెంటనే పూడ్చాలని ఆదేశించారు. వర్షపు నీరు నిలవకుండా డ్రైనేజీ కాలువలను క్రమం తప్పకుండా తనిఖీ చేయాలని, జాతీయ రహదారికి ఇరువైపులా ఉన్న చెత్తను తొలగించి పరిశుభ్రంగా ఉంచాలని అధికారులకు దిశానిర్దేశం చేశారు.స్థానిక యువత, నివాసితుల కోసం వినోద సౌకర్యాలను పెంచాలని కమిషనర్ సూచించారు.
ఇందులో భాగంగా అవుట్ డోర్ స్పోర్ట్స్ కాంప్లెక్స్ లు, థీమ్ పార్కుల అభివృద్ధికి తగిన స్థలాలను గుర్తించి నివేదికలు అందజేయాలన్నారు. ముగింపు సందర్భంగా కమిషనర్ సృజన మాట్లాడుతూ సుస్థిర పట్టణాభివృద్ధికి సిఎంసి కట్టుబడి ఉందని, ప్రతి సర్కిల్లో పౌర సౌకర్యాల మెరుగుదలే ధ్యేయంగా పనిచేయాలని అధికారులను ఆదేశించారు. క్షేత్రస్థాయిలో పనుల పురోగతిని తాను నిరంతరం పర్యవేక్షిస్తానని ఈ సందర్భంగా స్పష్టం చేశారు.ఈ కార్యక్రమంలో డిప్యూటీ కమిషనర్ సుదాంష్,డి ఏ విజయ లక్ష్మి జి హే ఎం సి సిబ్బంది తదితరులు పాల్గొన్నారు.