Featuredప్రాంతీయ వార్తలు

ఎపి శాసనమండలి రద్దు

  • చారిత్రకనిర్ణయం తీసుకున్న శాసనసభ
  • సుదీర్ఘ చర్చ అనంతరం ఏకగ్రీవం
  • ఆదాయం ఆదా అవుతుందన్న సిఎం
  • రద్దుకు ప్రతిపాదించామని సిఎం వైఎస్‌ జగన్‌ వివరణ

అమరావతి

ఆంధ్రప్రదేశ్‌ అసెంబ్లీ చారిత్రాత్మకమైన నిర్ణయం తీసుకుంది. ఆంధ్రప్రదేశ్‌ శాసన మండలి రద్దును ఆమోదిస్తూ చేసిన తీర్మానాన్ని శాసనసభ ఆమోదించింది. ఈ మేరకు సుదీర్ఘ చర్చ అనంతరం సిఎం వైఎస్‌ జగన్‌ రద్దుకు గల కారణాలను వివరించారు. అనంతరం శాసనసభలో సాయంత్రం ఓటింగ్‌ నిర్వహించారు. సభలో ప్రవేశపెట్టిన మండలి రద్దు తీర్మానానికి శాసనసభ ఏకగ్రీవంగా ఆమోదించింది. రద్దు తీర్మానంపై ముఖ్యమంత్రి వైఎస్‌ జగన్‌ మోహన్‌ రెడ్డి ప్రసంగం అనంతరం మండలి రద్దు తీర్మానంపై ఓటింగ్‌ జరిపారు. ప్రజాస్వామ్యాన్ని కాపాడుకోవాల్సిన అవసరం ఉంది. సీఎం నేతృత్వంలోని కేబినెట్‌ శాసనసభకు జవాబుదారీగా ఉంటుందని జగన్‌ అన్నారు. ముఖ్యమంత్రి వైఎస్‌ జగన్‌మోహన్‌రెడ్డి ప్రవేశపెట్టిన శాసనమండలి రద్దు తీర్మానాన్ని అసెంబ్లీ ఏకగ్రీవంగా ఆమోదించింది. సభకు హాజరైన 133 మంది సభ్యులు అనుకూలంగా ఓటు వేశారు. అనంతరం తీర్మానం ఆమోదం పొందినట్లు అసెంబ్లీ స్పీకర్‌ తమ్మినేని సీతారాం ప్రకటించారు. రాజ్యాంగంలోని 169 అధికరణ ప్రకారం రద్దు నిర్ణయం తీసుకున్నట్లు స్పీకర్‌ తెలిపారు. మండలిని రద్దు చేయాలని సోమవారం ఉదయం రాష్ట్ర మంత్రివర్గం నిర్ణయించింది. దీనికి అనుగుణంగా పెద్దల సభను రద్దు చేయాలని తీర్మానించి.. దానిని సీఎం జగన్‌ శాసనసభ ముందు ఉంచారు. దీనిపై రోజంతా సభ్యులు సుదీర్ఘంగా చర్చించారు. రాజకీయ ప్రయోజనాలకు కాకుండా రాష్ట్ర ప్రయోజనాలను దృష్టిలో ఉంచుకుని మండలిని రద్దు చేస్తున్నట్లు సభ్యులంతా తమ ప్రసంగాల్లో స్పష్టం చేశారు. చర్చలో భాగంగా మండలి రద్దు తీర్మానంపై ప్రసంగించిన సీఎం జగన్‌.. దీనికి ఆమోదం తెలపాలని సభ్యులను కోరారు. అనంతరం సభలో ఓటింగ్‌కు పెడుతున్నట్లు అసెంబ్లీ స్పీకర్‌ సీతారాం ప్రకటించారు. ముందుగా సభలో సభ్యులు కాని మంత్రులు మోపిదేవి వెంకటరమణ, పిల్లి సుభాష్‌ చంద్రబోష్‌లను పక్కన కూర్చోవాలని సూచించారు. అనంతరం సభలో ఓటింగ్‌ చేపట్టి.. ఆమోదం పొందినట్లు ప్రకటించారు. అనంతరం సభ నిరవధికంగా వాయిదా పడింది. అసెంబ్లీ ఆమోదించిన ఈ తీర్మానాన్ని రాష్ట్ర ప్రభుత్వం త్వరలోనే కేంద్రానికి పంపనుంది. పార్లమెంట్‌ ఉభయ సభలతో పాటు, రాష్ట్రపతి ఆమోదం తెలిపిన అనంతరం సభ పూర్తిగా రద్దు కానుంది. కాగా ఏపీలో శాసనమండలి రద్దు కావడం ఇది రెండోసారి. తొలిసారి మే 31, 1985న నాటి సీఎం ఎన్టీఆర్‌ రద్దు చేసిన విషయం తెలిసిందే.

రాజకీయ కోణంతో మండలిలో బిల్లులు అడ్డుకుంటున్నారు. మండలి వల్ల ప్రజాప్రయోజనాలకు ఆటంకం కలుగుతోంది. ఇలాంటి పరిస్థితుల్లో మండలి కోసం ప్రజాధనాన్ని వెచ్చించాల్సిన అవసరం లేదు. ప్రజా ప్రయోజనంలేని మండలి అవసరమా? అని ఆలోచించాలి. మండలి రద్దు చేస్తున్నామని చెప్పడం గర్వంగా ఉంది. మా పార్టీకి మండలిలో ఎక్కువ మందికి అవకాశం కల్పించే పరిస్థితి ఉన్నా ప్రజా ప్రయోజనాల కోసం ఈ నిర్ణయం తీసుకున్నామని’ జగన్‌ పేర్కొన్నారు. శాసనమండలిని రద్దు చేస్తున్నామని చెప్పడానికి గర్వపడుతున్నట్టు ముఖ్యమంత్రి వైఎస్‌ జగన్‌మోహన్‌రెడ్డి తెలిపారు. గతంలో ఎన్టీఆర్‌ శాసనమండలిని రద్దు చేసినప్పుడు ఈనాడులో ఆ నిర్ణయాన్ని కీర్తిస్తూ ఎడిటోరియల్స్‌ రాశారని అన్నారు. ఆనాడు కేవలం ఈనాడు అధిపతి రామోజీరావు కోసమే మండలిని రద్దుచేశారని గుర్తుచేశారు. కానీ నేడు కోట్లాది మంది ప్రజాప్రయోజనాల కోసం మండలి రద్దు నిర్ణయం తీసుకున్నామని స్పష్టం చేశారు. ముఖ్యమైన నిర్ణయంపై నేడు శాసనసభ సమావేశం జరుగుతోంది. మండలి రద్దు అనేది విషయం కాదు.. ప్రజాస్వామ్యాన్ని కాపాడుకోవాల్సిన అవసరం ఉంది. మండళ్లు కచ్చితంగా అవసరం అనుకుంటే ప్రతి రాష్ట్రంలో మండలి ఏర్పాటు అయి ఉండేది. మాకు మండళ్లు వద్దని అసోం, మధ్యప్రదేశ్‌, తమిళనాడు వంటి రాష్టాల్రు కోరుకున్నాయి. ఆర్టికల్‌ 169 ప్రకారం మండలి రద్దు అధికారం కూడా శాసనసభకే ఉంది. ప్రస్తుతం సభలో ఇంజనీర్లు, డాక్టర్లు, సివిల్‌ సర్వీస్‌ అధికారులు, జర్నలిస్టులు, ప్రొఫెసర్లు, ఉపాధ్యాయులు, రైతులు ఉన్నారు. వీరంతా ప్రజల చేత ఎన్నుకోబడిన నేతలు. మండలి ద్వారా ప్రజా ప్రయోజనాలకు ఆటంకం కలుగుతోంది. రాజకీయ అజెండాతో మండలిలో ప్రజలకు మేలు చేసే బిల్లులను అడ్డుకున్నారు. మండలిలో కేవలం బిల్లును ఎలా అడ్డుకోవాలనేదే ఆలోచిస్తున్నారు. మండలికి ఏడాదికి రూ. 60 కోట్లు ఖర్చు చేస్తున్నారు. ఒక దండగ పనికి ఇంత సొమ్ము ఖర్చు చేయడం అవసరమా అనే ఆలోచన చేయాలి. మండళ్లు చేసిన సవరణలను శాసనసభ ఆమోదించనక్కర్లేదు. శాసనమండలిని కొనసాగిస్తే.. మరో కొద్ది రోజుల్లోనే అక్కడ వైఎస్సార్‌సీపీకి మెజారిటీ వస్తోందని అందరికీ తెలుసు. కానీ అన్ని అంశాలను ఆలోచించి ప్రజా ప్రయోజనాల కోసమే ఈ నిర్ణయం తీసుకున్నామని సిఎం జగన్‌ వివరించారు. ఆపరేషన్‌.. ఆకర్ష్‌ అంటూ చంద్రబాబు పత్రికలు సిగ్గుమాలిన వార్తలు రాశాయి. ఓటుకు కోట్లు ఇస్తూ చంద్రబాబు ఆడియో, వీడియో టేపులతో అడ్డంగా దొరికిపోతే ఎల్లో మీడియా కనీసం నోరెత్తలేదు. మా పార్టీ ప్రతిపక్షంలో ఉన్నప్పుడు చంద్రబాబు ఎమ్మెల్యేలను కొనుగోలు చేస్తే అప్పుడు ఈనాడు, ‘చంద్ర’జ్యోతి, టీవీ5 ఎందుకు ప్రశ్నించలేదు?. మా ప్రభుత్వం ఎమ్మెల్సీలకు రూ. 5 కోట్లు ఆఫర్‌ చేస్తుందని దిక్కుమాలిన రీతిలో తప్పుడు ప్రచారం చేస్తున్నారు. చంద్రబాబు లాగా నేను చేస్తే ఆయనకు ప్రతిపక్ష నేత ¬దా కూడా రాదని ఎప్పుడో చెప్పాను. కానీ మేము అలా చేయడానికి రాలేదు. రాజకీయాలను మార్చడానికి అధికారంలోకి వచ్చామని జగన్‌ స్పష్టం చేశారు. అలాగే ప్రధాని నరేంద్ర మోడీ, కాంగ్రెస్‌, శాసమండలి, ప్రత్యేక ¬దా విషయాలపై చంద్రబాబు ఎలా మాటలు మార్చారో తెలిపే వీడియోను స్పీకర్‌ తమ్మినేని సీతారాం అనుమతితో సభలో ప్రదర్శించారు. అనంతరం సీఎం వైఎస్‌ జగన్‌ తన ప్రసంగాన్ని కొనసాగిసూ.. ‘ప్రత్యేక ¬దాపై చంద్రబాబు గడియకో మాట మాట్లాడారు. సోనియాను తిట్టారు.. మళ్లీ కాంగ్రెస్‌తోనే కలిశారు. మోడీని తిట్టిన చంద్రబాబు.. అదే మోడీని మెచ్చుకుంటూ మాట్లాడతారు. ఏ విషయంలో చంద్రబాబుకు స్థిరత్వం లేదు. మండలి విషయంలోనైనా క్లారిటీగా ఉన్నారంటే అది కూడా లేదు. అవసరం తీరితే కూతురిని ఇచ్చిన మామను పొడవడానికి కూడా చంద్రబాబు వెనుకడాడు. ఎస్సీ, ఎస్టీలకు ప్రత్యేక కమిషన్ల చట్టాన్ని, పేద విద్యార్థులకు మేలు చేసే ఇంగ్లిషు మీడియం చట్టాన్ని మండలిలో అడ్డుకున్నారు. వికేంద్రీకరణను కూడా అడ్డుపడ్డారు. అమరావతి రైతులకు అన్ని రకాలుగా న్యాయం చేస్తాం. రైతుల కౌలును 10 నుంచి 15 ఏళ్లకు పెంచడం అన్యాయమా?. అసైన్డ్‌ రైతులకు రైతులతో సమానంగా ఎ/-లాట్లు ఇస్తాం. రైతు కూలీల భృతిని రూ. 2,500 నుంచి రూ. 5 వేల పెంచుతున్నాం. చంద్రబాబులాగా గ్రాఫిక్స్‌లో జపాన్‌, సింగపూర్‌ లాగా అభివృద్ధి చేస్తామని చెప్పడం లేదు. ప్రజల కోసం చట్టాలు చేస్తుంటే రాజకీయ అజెండాతో అడ్డుపడుతున్నారు. గత ప్రభుత్వంలో చంద్రబాబు చేసిన తప్పిదాలకు రిపేర్లు చేస్తున్నాం. అన్ని ప్రాంతాల అభివృద్ది కోసం వికేంద్రీకరణ బిల్లును తీసుకొచ్చాం. అమరావతిని లెజిస్లేటివ్‌ రాజధానిగా ఇక్కడే కొనసాగిస్తూ.. విశాఖను ఎగ్జిక్యూటివ్‌ క్యాపిటల్‌గా, కర్నూలును న్యాయ రాజధానిగా ప్రకటించాం. అందరికి న్యాయం చేయడానికి ప్రయత్నించడం తప్పా’ అని ప్రశ్నించారు. మంచి చేయాలనుకున్నప్పుడు ఏ సమయమైనా మంచిదేనని అమెరికా పౌర హక్కుల నేత మార్టిన్‌ లూథర్‌ కింగ్‌ వ్యాఖ్యలను సీఎం వైఎస్‌ జగన్‌ ఈ సందర్భంగా గుర్తుచేశారు. అనంతరం శాసనమండలి రద్దు తీర్మానానికి శాసనసభ ఆమోదం తెలిపింది.

Tags

Related Articles

Leave a Reply

Your email address will not be published. Required fields are marked *

Back to top button
Close
Close