వణుకుతున్న తెలంగాణ

0

హైదరాబాద్‌ (ఆదాబ్‌ హైదరాబాద్‌): కశ్మీర్‌ నుంచి కన్యాకుమారి వరకు ఉష్ణోగ్రతలు పడిపోవడంతో ప్రజలు చలికి గజగజా వణికిపోతున్నారు. దేశవ్యాప్తంగా దాదాపు అన్ని రాష్ట్రాల్లో ఈ సీజన్‌లో అత్యల్ప ఉష్ణోగ్రతలు నమోదవుతున్నాయి. దేశరాజధాని ఢిల్లీ సహా, జమ్మూ కశ్మీరు, ఉత్తర్‌ప్రదేశ్‌, పంజాబ్‌, హరియాణా, మధ్యప్రదేశ్‌, రాజస్థాన్‌, సిక్కిం తదితర రాష్ట్రాల్లో చలిగాలులు తీవ్రంగా వీస్తున్నాయి. రాబోయే 24 గంటల్లో చలితీవ్రత మరింత పెరగనుందని, ఉష్ణోగ్రలు సాధారణ కంటే తక్కువ నమోదు కానున్నాయని వాతావరణశాఖ తెలిపింది. కశ్మీరులోయను మంచు ముంచెత్తడంతో తాగునీటి సరఫరా వ్యవస్థ స్తంభించింది. నీరంతా గడ్డకట్టుకుపోవడంతో ప్రజలు తాగునీటికి కటకటలాడుతున్నారు. లడఖ్‌ లేహ్‌లో మైనస్‌ 17.5 డిగ్రీల సెల్సియస్‌, కార్గిల్‌లో మైనస్‌ 16.7 డిగ్రీల సెల్సియస్‌ ఉష్ణోగ్రతలు నమోదయ్యాయి. కశ్మీర్‌లో పర్యాటకులను విశేషంగా ఆకర్షించే దాల్‌ సరస్సు గడ్డకట్టుకుపోయింది.

పంజాబ్‌, హరియాణాలోనూ ఇదే పరిస్థతి కనిపిస్తోంది. నీరు గడ్డకట్టే స్థాయికి పడిపోయిన ఉష్ణోగ్రతలతో ప్రజల జీవనం అస్తవ్యస్తమవుతోంది. ఇళ్ల నుంచి బయటకు రావడానికి ప్రజలు భయపడుతున్నారు. ఢిల్లీలో ఉష్ణోగ్రత శనివారం 2.6 డిగ్రీల సెల్సియస్‌కు పడిపోయింది. సీజన్‌ సగటుతో పోలిస్తే ఇది నాలుగు డిగ్రీలు తక్కువ. అటు హరియాణలోని అంబాలా-చండీగఢ్‌ జాతీయ రహదారిపై పొగమంచు కారణంగా వాహనాలు కనిపించక శనివారం ఉదయం ఒకదానికి ఒకటి ఢీకొట్టడంతో ఈ ప్రమాదంలో ఏడుగురు మ తి చెందగా, నలుగురు తీవ్రంగా గాయపడ్డారు. ఉత్తర్‌ప్రదేశ్‌ను చలిగాలులు ఉక్కిరిబిక్కిరి చేస్తున్నాయి. ఆగ్రాలో 1.7 డిగ్రీల సెల్సియస్‌ కనిష్ఠ ఉష్ణోగ్రత నమోదైంది. మధ్యప్రదేశ్‌లోనూ కనిష్ఠ ఉష్ణోగ్రతలు నమోదవుతున్నాయి.

మరోవైపు, తెలంగాణలో చలి తీవ్రత ఒక్కసారిగా పెరిగిపోయింది. ఆదిలాబాద్‌ జిల్లా భీంపూర్‌ మండలం అర్లి-టిలో శనివారం డిసెంబరులో పదేళ్ల అత్యల్పస్థాయికి ఉష్ణోగ్రత పడిపోయి 3 డిగ్రీల సెల్సియస్‌ నమోదైంది. ఇక్కడ, 2017 డిసెంబరు 27న నమోదైన 3.5 డిగ్రీలే ఇప్పటివరకు అత్యల్ప ఉష్ణోగ్రత. రాష్ట్రంలో చాలాచోట్ల పొగమంచు కురుస్తుండటంతో రోడ్డుపై వాహనాలు కనిపించక, పలుచోట్ల ప్రమాదాలు చోటుచేసుకుంటున్నాయి. పగటిపూట, రాత్రిపూట ఉష్ణోగ్రతల నడుమ భారీ వ్యత్యాసం ఉండటం వల్ల ప్రజలు శ్వాసకోస సమస్యల పాలవుతున్నారు. హైదరాబాద్‌లోనూ కనిష్ఠ ఉష్ణోగ్రతలు గణనీయంగా పడిపోయాయి. శనివారం రికార్డుస్థాయిలో ఉష్ణోగ్రత 9.9 డిగ్రీలకు పడిపోయింది. ఈ సీజన్‌లో రాత్రిపూట ఉష్ణోగ్రతలు 14 డిగ్రీల వరకు ఉంటాయి. కానీ అసాధరణంగా 5 డిగ్రీలు వరకు తగ్గిపోయింది. గత పదేళ్లలో ఇది రెండో అత్యల్పం.

ఉత్తర కోస్తాంధ్ర, ఒడిశాలపై కొనసాగుతున్న ఉపరితల ఆవర్తనం కారణంగానే చలితీవ్రత పెరిగిందని హైదరాబాద్‌ వాతావరణ కేంద్రం తెలియజేసింది. ఉత్తరాది నుంచి బలంగా వీస్తున్న శీతలగాలులు ఈ ఆవర్తనం కారణంగా కోస్తాప్రాంతం వద్ద వంపు తిరిగి, పశ్చిమ దిశగా పయనిస్తున్నాయి. దీనివల్ల వాతావరణం బాగా చల్లబడటమే కాదు, దీనికితోడు రాత్రిపూట ఆకాశం నిర్మలంగా ఉండటంతో భూవాతావరణం త్వరగా చల్లబడుతోంది. మరో రెండు రోజులు ఇదే తరహా వాతావరణం కొనసాగుతుందని పేర్కొంది.

LEAVE A REPLY

Please enter your comment!
Please enter your name here