Featuredజాతీయ వార్తలు

రోజుకు 9 గంటల పని!

  • సాధారణ పని దినంపై ప్రతిపాదనలు.
  • 8 గం. నుంచి 9 గం.కు పెంచాలని సూచనలు.
  • కార్మికులకు షాకిచ్చిన మోడీ

కార్మికుల పని గంటలపై కేంద్ర కార్మిక మంత్రిత్వ శాఖ కీలక ప్రతిపాదనలు చేసింది. ప్రస్తుతం ఉన్న పని గంటలను 8 నుంచి 9కి పెంచాలని వేతన కోడ్‌ ముసాయిదా బిల్లులో సూచించింది. అయితే, జాతీయ కనీస వేతనాన్ని నిర్ణయించడానికి మాత్రం అంతగా ఆసక్తి చూపలేదు. దీంతో కార్మిక సంఘాలు తీవ్రంగా మండిపడుతున్నాయి. సాధారణ పని దినంలో తొమ్మిది గంటలు ఉండాలని పేర్కొంటూ ముసాయిదాపై ప్రజాభిప్రాయ సేకరణ నిర్వహిస్తున్నారు. కానీ, వేతనాలపై లేబర్‌ కోడ్‌ మాదిరిగా ముసాయిదా నియమం కనీస వేతనాల విషయంలో నిర్ణయాన్ని నిపుణుల కమిటీకి వదిలేసింది. జాతీయ కనీస వేతన చట్టం ప్రకారం.. జులై 2018 నుంచి రోజుకు రూ.375 చెల్లించాలని ఈ ఏడాది జనవరిలో కేంద్ర కార్మిక శాఖలోని అంతర్గత వ్యవహారాల కమిటీ తన నివేదికలో తెలిపింది. దీంతోపాటు నెలకు రూ.9,750 కనీస వేతనం చెల్లించాలని ఏడుగురు సభ్యులు కమిటీ సిఫార్సు చేసింది. అలాగే నగరాల్లో పనిచేసే కార్మికులకు హెచ్‌ఆర్‌ఏ రూ.1,430 అదనంగా అందజేయాలని సూచించింది. ప్రజాభిప్రాయ సేకరణ అనంతరం ముసాయిదాకు డిసెంబరు నాటికి తుదిరూపు ఇవ్వనున్నారు. తాజా, ముసాయిదాలో మొత్తం మూడు భౌగోళిక ప్రాంతాలుగా విభజించి నిబంధనలు రూపొందించారు. 40 లక్షలు అంత కంటే ఎక్కువ జనాభా ఉండే మెట్రోపాలిటిన్‌ నగరాలు, 10 నుంచి 40 లక్షలలోపు జనాభా ఉండే నాన్‌-మెట్రోపాలిటిన్‌ నగరాలు, గ్రామీణ ప్రాంతాలకు వేర్వేరుగా కనీస వేతనాలను ముసాయిదాలో పేర్కొన్నారు. ఈ ముసాయిదాలో కనీస హెచ్‌ఆర్‌ఏ 10 శాతంగా పేర్కొగా, నగరాల వర్గం ఆధారంగా ఇది ఎక్కువ ఉంటుందా అనేది నిబంధనల్లో వెల్లడించలేదు. ఇక, ఇంధనం, విద్యుత్‌, ఇతర వస్తువులపై ఖర్చులు కనీస 20 శాతంగా ఉంటుంది. వేతనాన్ని లెక్కించేటప్పుడు ఒక కుటుంబానికి రోజుకు 2,700 కేలరీల ఆహారం, సంవత్సరానికి 66 మీటర్ల దుస్తులను పరిగణనలోకి తీసుకుంటారు. ఇవి 1957 నాటి కనీస వేతన గణనలో భాగమే. కనీస వేతనాల చట్టాన్ని సవరించిన కేంద్రం.. నాలుగు ప్రధాన చట్టాలను సమైక్యపరిచి ఒకే చట్టంగా రూపొందించింది. దీని ద్వారా కార్మిక చట్టాలను సంఘటితపరచి ఒకే గొడుకు కిందకు తీసుకువచ్చినట్టయ్యింది. దాదాపు 40 చట్టాల్లో 13 చట్టాలను మిళితం చేసి వ్యక్తిగత భద్రత, ఆరోగ్యం, పనిపరిస్థితులు-స్మృతిబిల్లు- 2019 రూపంలోకి తీసుకువచ్చారు. మరో నాలుగు ప్రధాన చట్టాలు వేతన కోడ్‌ బిల్లు-2019గా మారాయి. 1948 నాటి కనీస వేతనాల చట్టం, 1936 వేతనాల చెల్లింపు చట్టం, 1965 బోనస్‌ చెల్లింపు చట్టం, 1976 సమాన వేతన చట్టం వేతన కోడ్‌ బిల్లుగా వచ్చేశాయి. కొత్త కోడ్‌లో 69 క్లాజులను పొందుపరిచారు. తొలి చాప్టర్‌లో నిర్వచనాలు, త ర్వాత కనీస వేతనాలు గురించి, వేతనాల చెల్లింపు, బోనస్‌ చెల్లింపు, సలహా మండళ్లు, బకాయిల చెల్లింపు, ఆడిటింగ్‌, ఇనస్పెక్టర్ల నియామకం, నేరాలు, ఇతర అంశాల గురించి ఈ స్మృతిలో వివరంగానే చేర్చారు.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close