యుద్ధం మొదలైంది..

యుద్ధం మొదలైంది..


- ఆంధ్రప్రదేశ్ త్వరలోనే మరో శ్రీలంక కాబోతోంది.. 
- రౌడీల గుండెల్లో నిద్రపోయే పార్టీ తెలుగుదేశం పార్టీ.. 
- ఒంగోలులో టీడీపీ మహానాడు ముగింపు సభ.. 
- సంక్షేమానికి నాంది పలికింది నందమూరి తారక రామారావు
- ఉద్వేగభరితంగా ప్రసంగించిన చంద్రబాబు.. 

ఒంగోలు, 28 మే ( ఆదాబ్ హైదరాబాద్ ) :
ప్రభుత్వ అవినీతి, అధికార పార్టీ నాయకుల అరాచకాలపై ప్రతిపక్ష నేత చంద్రబాబు నాయుడు బాణం ఎక్కుపెట్టారు. మహానాడు సభలో ముఖ్యమంత్రి జగన్‌మోహన్ రెడ్డిపై చంద్రబాబు విమర్శనాస్త్రాలు సంధించారు. వైఎస్సార్‌సీపీ తమను ఎంత ఇబ్బందిపెడితే అంతగా రాటుదేలుతామని.. ఆ తర్వాత మీరు కూడా ఇదే రోడ్లపై తిరగాలి ఖబద్దార్ జాగ్రత్త అంటూ హెచ్చరించారు. ఈ మూడేళ్లలో జగన్ అవినీతి సొమ్ము రూ.1.75 లక్షల కోట్లకు చేరిందంటే పరిపాలన ఎలా ఉందో అర్థం చేసుకోవాలంటూ చంద్రబాబు నాయుడు అన్నారు.

ఎన్టీఆర్ శత జయంతి సందర్భంగా ఒంగోలులో నిర్వహించిన మహానాడుకు తెలుగుదేశం కార్యకర్తలు ఊహించిన దాని కంటే ఎక్కువగా తరలిరావడంతో.. జనసందోహాన్ని చూసిన చంద్రబాబు నాయుడు ఉత్సాహంతో ప్రసంగాన్ని ప్రారంభించారు. ఈ సందర్భంగా చంద్రబాబు మాట్లాడుతూ.. త్వరలోనే ఆంధ్రప్రదేశ్ మరో శ్రీలంక కాబోతోంది.. దీనికి మీరు అనుమతిస్తారా అంటూ ప్రశ్నించారు. వైఎస్సార్‌సీపీ కేసులు పెట్టినా తగ్గేది లేదని.. బుల్లెట్‌లా ముందుకెళ్తామన్నారు. ఎంత ఇబ్బంది పెడితే అంతగా రాటుదాలేమని.. ఇదే జరిగితే.. మళ్లీ మీరు మీ నాయకులు ఇదే రోడ్లపై తిరగాలి ఖబడ్దార్ జాగ్రత్తగా ఉండండి అంటూ హెచ్చరించారు. నేను కూడా అప్పుడు ఇలాగే వ్యవహరించి ఉంటే.. జగన్ పాదయాత్ర చేసేవాడేనా అంటూ ప్రభుత్వాన్ని ప్రశ్నించారు.

తీవ్రవాదులు, ముఠా నాయకులు, మతవిద్వేషాలను రెచ్చేగెట్టేవారిని అదుపు చేసిన పార్టీ టీడీపీ అని.. రౌడీల గుండెల్లో నిద్రపోయిన పార్టీ అంటూ చంద్రబాబు నాయుడు అన్నారు. ఇప్పుడు రాజకీయ రౌడీలు వచ్చారని.. ఖబడ్దార్ గుర్తు పెట్టుకోండి.. నేరస్థులను, దోపిడీ దొంగలను వదిలిపెట్టబోమంటూ హెచ్చరించారు. సంక్షేమానికి నాంది పలికింది ఎన్టీఆర్ అని, రెండు రూపాయలకు కిలో బియ్యం పథకాన్ని ప్రవేశపెట్టిన విషయాన్ని మహానాడు వేదిక మీద గుర్తు చేశారు. పక్కా ఇళ్లు కట్టించామన్నారు. తెలుగుదేశం పార్టీనే అన్నా క్యాంటీన్లను ప్రవేశపెట్టిందని, చంద్రన్న బీమా, నిరుద్యోగ భృతి కల్పించిందని మరి జగన్ సర్కారు ఎందుకు ఇవ్వదని చంద్రబాబు ప్రశ్నించారు. టీడీపీ హయాంలో ఆదాయంలో 53 శాతం సంక్షేమానికి వెచ్చించామని, వైఎస్సార్‌సీపీ దాన్ని 41 శాతానికి తగ్గించిందని చంద్రబాబు ఆరోపించారు. సంక్షేమ కార్యక్రమాల పేరిట దోపిడీ చేస్తున్నారని, ఈ సీఎం వచ్చాక రూ.8 లక్షల కోట్ల అప్పు చేశారన్నారు. ఈ అప్పును కట్టేది ఎవరు..? జగన్ కడతారా..? మీరే కట్టాలని చంద్రబాబు చెప్పారు. బాదుడే బాదుడులో వచ్చిన డబ్బులు జగన్ జేబులోకి వెళ్లాయన్నారు.

"మన తమ్ముళ్లు కూడా అప్పుడప్పుడు మద్యం సేవిస్తారు. కింగ్ ఫిషర్ బీర్ ఉందా ఇప్పుడు..? బూమ్ బూమ్ బీరు ఉంది. ఒకప్పుడున్న మెక్ డోవెల్ ఉందా..? ప్రెసిడెంట్ మెడల్, స్పెషల్ స్టేటస్ ఉంది. ఇంజినీర్ బ్రాండ్, అడ్వొకేట్ బ్రాండ్ కూడా వస్తున్నాయి" అంటూ వ్యగ్యంగా విమర్శించారు. ఎన్నికల ముందు మద్యపాన నిషేధం అమలు చేస్తామని ఎందుకు కొత్త బ్రాండ్లు తీసుకొస్తున్నారని చంద్రబాబు విమర్శించారు. ఒకప్పుడు క్వార్టర్ బాటిల్‌కు రూ.9 అయితే ఇప్పుడు ఈయన రూ.21 ఇస్తున్నారు. అంటే రూ.12 జగన్ జేబుల్లోకి వెళ్తున్నాయి. మీరు తాగే క్వార్టర్‌తో జగన్ జేబుల్లోకి రూ.12 వెళ్తున్నాయని వివరించారు. కిరాణా దుకాణాల్లో కూడా ఆన్‌లైన్‌లో డబ్బులు తీసుకుంటున్నారని.. కానీ లిక్కర్ షాపుల్లో మాత్రం తీసుకోవడం లేదు. లిక్కర్ మీదే జగన్‌కు ఏడాదికి రూ.5 వేల కోట్ల ఆదాయం సమకూరుతోందని ఆరోపించారు.

గ్రానైట్‌ను లాగేసుకున్నారు :
రాష్ట్రంలో ఉన్న ఖనిజ సంపదను వైఎస్సార్‌సీపీ హస్తగతం చేసుకుందని చంద్రబాబు ఆరోపించారు. 'ప్రకాశం జిల్లాలో గెలాక్సీ గ్రానైట్ ఉంది. కానీ బెదిరింపుల ద్వారా మనోళ్ల దగ్గర్నుంచి లాగేసుకున్నారు. గూగుల్ మ్యా్ప్‌లు ఉన్నాయి. రేపు అన్నీ విచారణ జరిపిస్తా. మీ అవినీతిని కక్కిస్తాను. రూ.5-6 లక్షల విలువైన భూమిని కోటి రూపాయలకు కొనుగోలు చేసి దొంగలు దొంగలు పంచుకున్నట్టుగా పంచుకుంటున్నారు. ఎవరైనా మీ భూములను అన్యాక్రాంతం చేస్తే ఇప్పించే బాధ్యత నాది. ఈ మూడేళ్లలో జగన్ అవినీతి సొమ్ము రూ.1.75 లక్షల కోట్లు. ఇప్పుడు అర్థమైందా.. మనం చేసిన అప్పులన్నీ ఎక్కడికి పోయాయి. అంతా దోచుకుంటున్నారు. విశాఖ, తూర్పుగోదావరి జిల్లాల నుంచి రోజుకు 500-1000 లారీల లాటరైట్‌ను తరలిస్తున్నారు' అని చంద్రబాబు ఆరోపించారు. రాష్ట్రంపై రూ.8 లక్షల కోట్ల అప్పు ఉంటే.. జగన్ ఖజానాలోకి రూ1.75 లక్షల కోట్లు వెళ్లాయని చంద్రబాబు నాయుడు ఆరోపించారు. రాష్ట్రంలో ఏ వ్యవస్థ పని చేయడం లేదని.. ఎమ్మార్వోలు, అగ్రికల్చర్ విభాగం పని చేయడం లేదంటూ విమర్శించారు. జగన్ విధ్వంసానికి అన్ని విభాగాలు ధ్వంసమయ్యాయి. రైతులంతా చితికిపోయారని చంద్రబాబు నాయుడు ఆగ్రహం వ్యక్తం చేశారు.

Tags :