నలుగురు మృతి దిల్లీలో అగ్నిప్రమాదం

Updated:13/04/2018 12:41 PM

4 members died in delhi due to fire accident

రాజధాని దిల్లీ నగరంలో విషాదం చోటుచేసుకుంది. అగ్ని ప్రమాదం కారణంగా ఒకే కుటుంబానికి చెందిన నలుగురు ప్రాణాలు కోల్పోయారు. వారిలో ఇద్దరు చిన్నారులు ఉన్నారు. వాయువ్య దిల్లీలోని కొహాట్‌ ఎన్‌క్లేవ్‌లోని నాలుగంతస్థుల భవనంలో మంటలు చెలరేగి ప్రమాదానికి కారణమయ్యాయి. నలుగురు చనిపోగా, మరో ముగ్గురు గాయపడ్డారు. తెల్లవారుజామున 2.48 ప్రాంతంలో భవనం పార్కింగ్‌ ప్రాంతంలో మంటలు చెలరేగినట్లు తమకు ఫోన్‌ వచ్చిందని అగ్నిమాపక సిబ్బంది వెల్లడించారు. హుటాహుటిన అక్కడికి చేరుకుని పది అగ్నిమాపక యంత్రాల సాయంతో మంటలు అదుపులోకి తీసుకొచ్చామని అధికారులు వెల్లడించారు.

మొదటి అంతస్థులోని తమ ఫ్లాట్‌లో ఇద్దరు చిన్నారులు సహా నలుగురు నిద్రిస్తున్నారు. కింద నుంచి పొగలు వెలువడుతున్నట్లు గమనించిన వారు బయటకు వచ్చేందుకు ప్రయత్నించారు. కానీ పొగలు విపరీతంగా అలుముకోవడంతో ఊపిరాడక చనిపోయారని అధికారులు తెలిపారు. అయితే అగ్ని ప్రమాదానికి గల కారణం తెలియాల్సి ఉంది. ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.