Featuredస్టేట్ న్యూస్

ఈఎస్‌ఐలో మరో అవినీతి తిమింగలం

  • ఐఎంఎస్‌ డైరెక్టరేట్‌ సూపరింటెండెంట్‌ అరెస్టు..
  • లోతుగా దర్యాప్తు చేస్తున్న ఏసీబీ అధికారులు

తెలుగు రాష్ట్రాల్లో సంచలనం సృష్టించిన ఈఎస్‌ఐ కుంభకోణం వ్యవహారంలో తవ్వేకొద్ది మరిన్ని వాస్తవాలు వెలుగుచూస్తున్నాయి. తెలుగు రాష్ట్రాల్లో సంచలనం సృష్టించిన ఈ కేసు ఇప్పుడు అధికారులకు సవాల్‌గా మారింది. ఈఎస్‌ఐ స్కాంలో మరో అధికారి ఐఎంఎస్‌ డైరెక్టరేట్‌ సూపరింటెండెంట్‌ వీరన్నను అరెస్ట్‌ చేశారు. డైరెక్టర్‌ దేవికారాణి తరపున ఫార్మా కంపెనీల నుంచి ముడుపులు వీరన్న తీసుకున్నట్లు..ఆ డబ్బులతో బంగారు ఆభరణాలు కొని దేవికారాణికి ఆయన ఇచ్చినట్లు ఆరోపణలు ఉండటంతో అరెస్ట్‌ చేశారు. సూపరింటెండెంట్‌ వీరన్న అక్రమాలపై ఏసీబీ అధికారులు ఆరా తీస్తున్నారు. ఈ కుంభకోణంలో ప్రధాన సూత్రధారిగా ఉన్న ఐఎంఎస్‌ డైరెక్టర్‌ దేవికారాణి ఏకంగా 38 కంపెనీలు స్థాపించినట్లు విశ్వసనీయ వర్గాల సమాచారం. ఐఎంఎస్‌ అధికారులు సొంతంగా బోగస్‌ సంస్థలను ఏర్పాటుచేసి వందల కోట్లు కాజేసినట్టు తెలుస్తోంది. మరికొందరితో కలిసి బోగస్‌ సంస్థలను స్థాపించి పెద్దఎత్తున లావాదేవీలు జరిపినట్లు అవినీతి నిరోధకశాఖ అధికారులు గుర్తించారు. ఆమెతోపాటు మిగతా అధికారులూ ఇదే తరహాలో సంస్థలను స్థాపించి, గోల్‌మాల్‌ చేసినట్టు నిర్ధారణకు వచ్చారు. దీంతో ఈ బోగస్‌ సంస్థల ద్వారా ఎలాంటి లావాదేవీలు జరిగాయి? వాటి విలువ ఎంత? అనేది నిగ్గు తేల్చేందుకు ఏసీబీ అధికారులు ప్రయత్నిస్తున్నారు. ఐఎంఎస్‌ కుంభకోణంలో ఇప్పటి వరకూ 8 మంది నిందితులను రెండుసార్లు కస్టడీలోకి తీసుకొని విచారించారు. మరోసారి ప్రధాన నిందితురాలు దేవికారాణితోపాటు అసిస్టెంట్‌ డైరెక్టర్‌ వసంత ఇందిరలను రెండు రోజులపాటు కస్టడీలోకి తీసుకొని విచారించారు. ఈఎస్‌ఐ అధికారులు, ప్రైవేటు వ్యక్తులతో కుమ్మక్కై నాలుగేళ్లలో దాదాపు రూ.250 కోట్లు కొళ్లగొట్టిన విషయం తెలిసిందే. తీగలాగితే డొంక కదులుతున్నట్టు ఏ ఫైలు పట్టుకున్నా రూ.కోట్లకు కోట్ల అవినీతి బయటపడుతోంది. కేవలం రెండు రోగ నిర్ధారణ కిట్ల కొనుగోళ్లలోనే రూ.1.02 కోట్లు తినేసినట్టు గుర్తించగా, ఇలాంటి లావాదేవీలను అధికారులు విశ్లేషిస్తున్నారు. ఈ కేసులో 17మంది ఉద్యోగులు, నలుగురు ప్రయివేట్‌ వ్యక్తుల ప్రమేయం ఉన్నట్లు ఏసీబీ అధికారులు గుర్తించారు. నకిలీ బిల్లులు సృష్టించి, అవసరం లేకున్నా మందులు కొనుగోలు చేసినట్లు గుర్తించిన ఏసీబీ.. హైదరాబాద్‌తో పాటు వరంగల్‌లో సోదాలు నిర్వహించారు. బోగస్‌ కంపెనీల ద్వారా పెద్ద మొత్తంలో నిధులు దారి మళ్లించినట్లు అనుమానిస్తున్నారు. ఇప్పటి వరకు మూడుసార్లు నిందితులను ప్రశ్నించగా ప్రతిసారీ వాటి గురించే మాట్లాడినట్లు తెలుస్తోంది. ఈ డొల్ల కంపెనీల ద్వారా జరిగిన లావాదేవీల విలువ ఎంతనేది లెక్కగడుతున్నారు. కుంభకోణంలో సగం సొమ్ము డొల్ల కంపెనీల నుంచే మళ్లిందని తెలుస్తోంది. ఈ కంపెనీల ద్వారా జరిగిన లావాదేవీలు, ఐటీ చెల్లింపులపైనా అధికారులు దృష్టి సారించారు.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close
Close