ప్రవహిస్తున్న ఆంధ్రా డబ్బు

0

హైదరాబాద్‌ (ఆదాబ్‌ హైదరాబాద్‌): నాలుగు రోజుల్లో తెలంగాణ అసెంబ్లీ ఎన్నికలు జరగనున్న వేళ పలు నియోజకవర్గాల్లో నగదు పంపిణీ కలకలం రేపుతోంది. పోలీసుల తనిఖీల్లో భారీగా డబ్బు పట్టుబడుతోంది. దీంతో అధికారులు తనిఖీలను విస్త తం చేశారు. ఆదివారం (డిసెంబర్‌ 3) రాత్రి హైదరాబాద్‌లోని అమీర్‌పేటలో ప్రజాకూటమి అభ్యర్థులకు సంబంధించిన వ్యక్తుల వద్ద నగదు లభించడం టీఆర్‌ఎస్‌, టీడీపీ కార్యకర్తల మధ్య వాగ్విదానికి దారి తీసింది. దీంతో ఉద్రిక్తత నెలకొంది. మరోవైపు.. శేరిలింగంపల్లిలో ప్రజాకూటమి తరఫున బరిలోకి దిగిన టీడీపీ అభ్యర్థి, ప్రముఖ పారిశ్రామికవేత్త భవ్య ఆనందప్రసాద్‌ కుమారుడి కారులో రూ. 70 లక్షలు లభించడం కలకలం రేపింది. సికింద్రాబాద్‌లో రామ్‌గోపాల్‌పేట పోలీస్‌స్టేషన్‌ పరిధిలోని సింధీ కాలనీ వద్ద టాస్క్‌ ఫోర్స్‌ పోలీసులు తనిఖీలు జరుపుతున్న వేళ.. భవ్య సిమెంట్స్‌ డైరెక్టర్‌ శివకుమార్‌కు సంబంధించిన కారులో సరైన లెక్కలు లేని నగదు కనిపించడంతో డబ్బును సీజ్‌ చేశామని పోలీసులు వెల్లడించారు. శివకుమార్‌తో పాటు కారు డ్రైవర్‌ను అదుపులోకి తీసుకున్నారు. అయితే.. తనిఖీల సమయంలో సదరు కారులో భవ్య ఆనందప్రసాద్‌ గానీ, ఆయన కుమారుడుగానీ లేరు. కారు మాత్రం భవ్య శివకుమార్‌ పేరిట రిజిస్టర్‌ అయుంది. ఈ డబ్బు తమ వ్యాపార కార్యకలాపాల నిమిత్తం తరలిస్తున్నట్టు భవ్య శివకుమార్‌ తెలిపారు. డబ్బు ఎక్కడిదనే విషయమై అధికారులకు సరైన పత్రాలు అందిస్తామన్నారు. నగదుకు సంబంధించి స్పష్టమైన వివరాలు ఇవ్వకపోవడంతో పోలీసులు డబ్బును స్వాధీనం చేసుకుని కారును, శివకుమార్‌ సెల్‌ఫోన్‌ను సీజ్‌ చేశారు. అమీర్‌పేట్‌లో ఆదివారం అర్ధరాత్రి ఉద్రిక్త పరిస్థితి నెలకొంది. సనత్‌నగర్‌ నియోజకవర్గంలో ఓటర్లకు టీడీపీ కార్యకర్తలు డబ్బు పంచుతున్నారంటూ టీఆర్‌ఎస్‌ కార్యకర్తలు గొడవకు దిగారు. అడ్డుకునేందుకు యత్నించిన ఎస్సైపై కూడా దాడికి పాల్పడారు. గుంటూరు జిల్లా తెనాలికి చెందిన వీరారెడ్డి, సాంబశివ, కొలిశెట్టి శ్రీనివాస్‌ అమీర్‌పేట్‌లోని సిల్వర్‌ పార్క్‌ హోటల్లో వేర్వేరు గదుల్లో బస చేశారు. సనత్‌నగర్‌లో ప్రజాకూటమి తరఫున పోటీ చేస్తున్న టీడీపీ అభ్యర్థి కూన వెంకటేష్‌ గౌడ్‌ అర్ధరాత్రి వేళ ఈ హోటల్‌ వద్దకు రావడాన్ని టీఆర్‌ఎస్‌ కార్యకర్తలు గుర్తించారు. గుంటూరుకు చెందిన టీడీపీ కార్యకర్తలతో కూన వెంకటేష్‌ గౌడ్‌ మాట్లాడుతుండటాన్ని గమనించిన టీఆర్‌ఎస్‌ కార్యకర్తలు హోటల్‌ వద్దకు చేరుకున్నారు. ఓటర్లను ప్రలోభాలకు గురిచేసేందుకు డబ్బు పంచుతున్నారని ఆరోపిస్తూ ఆందోళనకు దిగారు. సమాచారం అందుకున్న పోలీసులు హోటల్‌లో తనిఖీలు చేసి గుంటూరు జిల్లా తెనాలికి చెందిన నలుగురు కార్యకర్తలను అదుపులోకి తీసుకున్నారు. హైదరాబాద్‌కు చెందిన ఓ టీడీపీ కార్యకర్తపై టీఆర్‌ఎస్‌ కార్యకర్తలు దాడికి యత్నించారు. అడ్డుకునేందుకు యత్నించిన ఎస్సై అశోక్‌ను తోసేశారు. సమాచారం తెలుసుకున్న గోషామహల్‌ ఏసీపీ నరేందర్‌ రెడ్డి అక్కడకు చేరుకుని పరిస్థితిని అదుపులోకి తెచ్చారు. టీడీపీ నాయకులకు చెందిన రెండు కార్లతో పాటు.. వారు బస చేసిన హోటల్లోని మూడు గదుల్లో పోలీసులు సోదాలు చేశారు. ఓ కారులో రూ.2 లక్షలు లభించగా.. మూడు గదుల్లో మరో రూ. 2,74,000 రూపాయల్ని సీజ్‌ చేశారు. ఎన్నికల ఫ్లయింగ్‌ స్క్వాడ్‌ కు చెందిన అధికారులు కూడా సోదాలు నిర్వహించారు. సరైన పత్రాలు చూపించకపోవడంతో టీడీపీ కార్యకర్తలకు చెందిన రూ.4.74 లక్షలను సీజ్‌ చేశామని అధికారులు తెలిపారు. డబ్బులు పంపిణీ చేస్తున్నట్టు ఆధారాలు మాత్రం లభించలేదని వెల్లడించారు.

LEAVE A REPLY

Please enter your comment!
Please enter your name here